Karlos Kardoso: Bu, hakimin qeyri-peşəkarlığıdır

"Neftçi"nin müdafiəçisi Karlos Kardosonun azerisport.az saytına müsahibəsi

- AZAL - "Neftçi" oyunu ilə bağlı nə deyə bilərsiniz?
- AZAL-a qarşı onun meydanında oynamaq çətindir. Çünki ot örtüyünün keyfiyyəti çox aşağıdır. Rəqibin heyətində güclü futbolçular var. Amma buna baxmayaraq, qələbə qazana bildik.

- Komandanız ikinci hissədə niyə müdafiə olunmağa başladı?
- Hücumda top saxlamaq çətin olurdu. Bu üzdən hesabdakı üstünlüyümüzü qorumağa qərar verdik.

- "Neftçi"nin oyun planında problemləri var?
- Çətinliklərimiz olsa da, qalib gələ bildik. Fikrimcə, zaman keçdikcə problemlərimiz daha da azalar.

- Epizodların birində Freddi Mombonqo ilə nəyisə bölüşə bilmirdiniz...
- O, çox sərt oynayırdı. Son oyunda da bizə iki qol vurmuşdu. Bu oyunda onu "bağlamağa" çalışırdım ki, yenə qol vurmasın.

- Oyunun sonlarında hakimlər mübahisə edirdiniz. Orada nə baş vermişdi?
- Hərdən hakimlərin qərarı ilə razılaşmadığım məqamlar olur. Amma burada beşinci hakim məni təhqir etdi. Bu, qeyri-peşəkarlıqdır. Çünki o, həm də məndən balacadır.

- Hakim sizi niyə təhqir etdi ki?
- Hakim bizim lehimizə qərar qəbul etmədi. Mən də bunu onun diqqətinə çatdırdım. Amma referi qayda pozuntusunu qeydə almaq əvəzinə, məni təhqir etdi. Azərbaycanda artıq ilyarımdır çıxış edirəm və bəzi sözləri başa düşürəm.

- Bəlkə siz onu düzgün başa düşməmisiniz?
- Xeyr, düz başa düşdüm. Amma ona cavab verməməyi qərara aldım. Ona uğurlar arzulayıram və ümid edirəm ki, gələcəkdə belə səhvlər buraxmaz.

- Bəs baş hakimlə niyə mübahisə edirdiniz?
- Hərdən bəzi qərarları ilə razılaşmırdım. Amma bu, normaldır.

- Bəlkə o, sizin aqressiv oynamamağınızı tələb edirmiş?
- Mən belə məktəb keçmişəm, ona görə də aqressiv oynayıram. Rusiyada da elə oynayırdım. Məni cəmi bir dəfə meydandan qovublar, o da "Xəzər Lənkəran"la görüşdə olub.

- Hər iki matçın baş hakimi Elvin Əsgərov olub...
- Həmin oyunda problemlər var idi. Bu dəfə isə hakimliklə bağlı problem olmadı.