Əfran İsmayılov: Əsas o idi ki, Robert Prosineçkinin bizdən nə istədiyini başa düşdük
Azərbaycan yığmasının yarımmüdafiəçisi Əfran İsmayılovun azerisport.az saytına müsahibəsi
- Ukrayna "Şaxtyor"u ilə oyun barədə nə deyə bilərsiniz?
- Maraqlı oyun alındı. Komandamız qısa müddət idi bir yerdəydi. Amma buna baxmayaraq, ciddi hazırlaşmışdıq. Əsas odur ki, Robert Prosineçkinin bizdən nə istədiyini başa düşdük. Onun tələb etdiyi kimi çıxış etməyə çalışdıq.
- Öz oyununuzdan razı qaldınız?
- Bütövlükdə götürsək, yaxşı oynadığımı demək olar. Elə komandamız da.
- Tez-tez oyunu öz üzərinizə götürməyə çalışırdınız. Bunu baş məşqçi tələb etmişdi?
- Baş məşqçi özü demişdi ki, hücumdakı futbolçular oyunu öz üzərinə götürməkdə sərbəstdirlər. Prosineçki bizdən hücum futbolu tələb edir. Amma müdafiəni unutmamaq şərti ilə.
- Hər hissəyə fərqli heyətlər çıxdı. İkinci hissədə oynayanlar birinci hissədəkilərlə müqayisədə o qədər də effektli çıxış etmədilər və zəif oyun diqqət çəkdi. Razısınız?
- Onları başa düşmək olar. İkinci hissədə oynayanların əksəriyyəti gənclər idi. Buna baxmayaraq, layiqli təsir bağışladıq. Hətta qol vurmaq şanslarımız da var idi.
- İlk dəfə yığmamızın heyətində klub komandasına qarşı oynadınız...
- Maraqlı təcrübə oldu. Rəqibin heyətində keyfiyyətli futbolçular çox idi. Onlara qarşı oynamaq maraqlı idi. "Şaxtyor" Çempionlar Liqasında çıxış edən komandadır. Onlarla oynamaqdan zövq alırsan.
- Yəqin ki, Berti Foqtsun müdafiə futbolundan sonra Prosineçkinin hücum futbolu ürəyinizcədir...
- Əlbəttə. Bu, bizi çox sevindirir. Azərbaycanda topla yaxşı davranan futbolçular az deyil. Xorvatiyalı mütəxəssisin oyun üslubu tam ürəyimizcədir. Ona görə hətta məşqlərimiz də maraqlı və faydalı olur.
- Meydanda kifayət qədər inamlı təsir bağışlayanlardan biri də siz oldunuz. Düşünmürsünüz ki, bununla Malta ilə seçmə mərhələ oyunu üçün əsas heyətdə yer almağı təmin etdiniz?
- Bu haqda danışmaq hələ tezdir. Bizi qarşıda daha bir toplanış gözləyir. Həmin toplanışda da özümüzü göstərməyə çalışmalıyıq. Üstəlik, klubumuzda da sabit oynamaq lazımdır.
