Elvin Camalov: Şaxtyora qarşı oynamağı çox istəyirəm

Azərbaycan yığmasının və "Qəbələ"nin yarımmüdafiəçisi Elvin Camalov azerisport.az saytına müsahibə verib.

- Yığmanın toplanışı necə keçir?
- Prosineçki və onun məşqçilər korpusu çox təcrübəlidir. Bunu məşqlərdən görmək olur. İlk gündən məşqlərimiz çox yaxşı keçir. Hər kəs özünü ən yaxşı tərəfdən göstərməyə çalışır. Eləcə də mən. Bu toplanış mənim üçün yaxşı şansdır. Özümü maksimum göstərməyə çalışıram.

- Yığma komandada qalmağı düşünürsünüz?
- Əlbəttə. Yığmada oynamaq və bununla fəxr etmək istəyirəm. Ələ düşən şansdan maksimum yararlanmaq lazımdır.

- İlk dəfədir yığmaya dəvət olunmusunuz. Sizi ən çox təəccübləndirən, sevindirən nə oldu?
- Məni burada məyus edən heç nə yoxdur. Əksinə, gördüklərimin hamısı sevindiricidir. Hamımız Azərbaycan yığmasının şərəfini qoruyuruq. Buna görə necə məyus olmaq olar?

- Robert Prosineçkinin diqqətini necə çəkməyi düşünürsünüz?
- Bunu zaman göstərəcək. Mən gəncəm və özümü göstərməyim lazımdır.

- Roman Qriqorçukla Prosineçki arasında nə kimi fərqlər var?
- Hər ikisi çox təcrübəlidir. Onların arasında müqayisə aparmayacağam. Çünki bu, mən tərəfdən düzgün addım olmaz.

- Qazaxıstan "Şaxtyor"u ilə yoxlama matçından nə gözləyirsiniz?
- Bizim üçün hər oyun vacibdir. Bu görüşdə iştirak etməyi çox istərdim. Amma hər şeyə baş məşqçi qərar verəcək.