Böyükağa Hacıyev: Robert Prosineçki millidə mentaliteti dəyişməlidir

AFFA-nın Məşqçilər Şurasının üzvü Böyükağa Hacıyev Azərbaycan yığmasının Türkiyədəki təlim-məşq toplanışını dəyərləndirib. Azerisport.az saytına açıqlamasında o, bunları söyləyib:

"Robert Prosineçkinin işi xoşuma gəlir. O, Berti Foqtsdan tamamilə fərqlənir. Özünüz baxın - məşqin böyük hissəsi toplu çalışmalara həsr olunur. Hansı ki, əvvəllər bunu görmək olmurdu".

Hacıyevin sözlərinə görə, Prosineçki millinin oyun üslubunu dəyişməyə çalışır: "Xorvat mütəxəssis istəyir ki, milli Foqtsun dövründəki kimi oynamasın. Mən almanı nədəsə günahlandırmaq istəmirəm. İstənilən halda o, futbolçu karyerası zamanı müdafiəçi olub. Onun taktikası fiaskoya uğrayan - millimiz böyük hesabla uduzan kimi, istefa verdi".

"Bizim azarkeşlər yığmamızın daha baxımlı, açıq futbolunu izləməyə layiqdirlər. "Neftçi"də çalışdığım günləri yada salın. O, zaman biz Milan "İnter"i ilə də sanki, "Sumqayıt"la oynayırmış kimi mübarizə aparırdıq. Bütün rəqiblərə eyni gözlə baxırdıq. Heç kimdən çəkinmirdik, amma hörmət edirdik. Şəxsən mən yığmamızın da elə olmasını çox istəyirəm".

"Mənə elə gəlir ki, yığmada mentalitet mütləq dəyişməlidir. Müdafiədə oturmağımız yetər. Əminəm ki, Prosineçki öz fəlsəfəsini futbolçulara aşılaya biləcək. Ondan qorxmuram ki. Yaxşı mütəxəssisdir. Amma daha dəqiq danışmaq üçün gərək Ukrayna "Şaxtyor"u ilə oyunu da görək".