Böyükağa Hacıyev: Millinin azarkeşləri baxımlı futbol görə biləcək

AFFA-nın Məşqçilər Komitəsinin üzvü Böyükağa Hacıyev Azərbaycan yığmasının Antalyadakı təlim-məşq toplanışını dəyərləndirib. Azerisport.az saytına müsahibəsində o, bunları söyləyib:

"Robert Prosineçkinin yığmadakı məşq prosesi çox xoşuma gəlir. Onun məşqləri Berti Foqstunkundan çox fərqlidir. Çünki xorvatiyalı mütəxəssis hücuma daha çox diqqət ayırır. Mən həmişə komandalarımdan hücum futbolu oynamağı tələb etmişəm. Çox sevinirəm ki, Prosineçki də yığmadan elə oyun tələb edir. Oyunçuların belə oyun üslubuna alışması üçün zamana ehtiyacın olması ayrı məsələdir. Amma fikrimcə, azarkeşlər millidən baxımlı futbol görə biləcəklər. Məşqlərdəki müşahidələrimə əsasən çıxardığım nəticə belə deməyə əsas verir".