Vidadi Rzayev: Qarabağ inkişaf edir, digər klublarımız isə yerində sayır

Azərbaycanın veteran futbolçusu Vidadi Rzayevin azerisport.az saytına müsahibəsi

- "Qarabağ" son turda "Neftçi"yə qalib gəlməklə xal fərqini daha da artırdı. Sizə elə gəlmir ki, Premyer Liqada intriqa artıq tamamilə öldü?
- Təəssüf ki, çempionluq uğrunda mübarizədə heç bir intriqa qalmayıb. Ümumiyyətlə, bu mövsüm çempionat çox zəif keçir. Ağdamlılarla rəqabət aparan yoxdur. Çempionata marağı öldürən daha bir məqam 9 klubdan ibarət olmasıdır. Əminəm ki, komandaların özünə də belə mübarizə aparmaq maraqsızdır.

- "Qarabağ"la rəqabət apara bilən niyə yoxdur?
- Çempion inkişaf edir, digər klublar isə yerində sayırlar, hətta geriyə gedirlər.

- Sizcə, mükafatçılar siyahısı necə müəyyənləşəcək?
- "Neftçi" "İnter"lə mübarizə aparmağa çalışır. Böyük ehtimalla digər mükafatçılar məhz bu komandalar olacaq. Bizdə maraqlı və güclü çempionat ancaq 14 klubla keçiriləndə olacaq.

- Sizcə, növbəti mövsümlər də "Qarabağ"ın diqtəsi ilə keçəcək?
- Proqnozlaşdırmaq çətindir. Amma düşünmürəm ki, intriqa yenə mövsümün ortasında ölsün. Ümid edirəm ki, klublarımız bu mövsümdən nəticə çıxaracaqlar.

- Martın 6-da AFFA İcraiyyə Komitəsinin iclası keçiriləcək. Həmin iclasda gənc futbolçuların maaşına limit qoyulacaq. Buna münasibətiniz necədir?
- Nə deyəcəyimi bilmirəm. Başa düşmürəm bu nə deməkdir. Həyatımda ilk dəfədir belə şey eşidirəm. Bəs daha artığına layiq olan futbolçuların aqibəti necə olacaq? Niyə onlar layiq olduqlarından az almalıdırlar?

- Deməli, siz Klublar Komitəsinin bu istəyi ilə razı deyilsiniz?
- Bilirsiniz ki, əgər klublar özləri istəsə, bu, olacaq. Amma görək bu ümidləri doğruldacaqmı? Əgər bu qərardan sonra gənclərimiz xaricdə oynamağa daha çox maraq göstərsələr, sayları artsa, o zaman bu qərarı uğurlu saymaq olar.

- Azərbaycan yığmasının Ukrayna "Şaxtyor"u ilə yoxlama oyunundan nə gözləyirsiniz?
- Əgər məşqçilər klub komandası ilə oynamağı istəyirlərsə, yəqin ki, faydalı olacağını düşünürlər. "Şaxtyor"un hansı heyətlə oynayacağı hələ bəlli deyil. Hər halda maraqla gözlənilir.