Vüqar Nadirov: Robert Prosineçkinin futbola münasibəti ürəyimcədir

Azərbaycan yığmasının və "Qarabağ"ın hücumçusu Vüqar Nadirovun azerisport.az saytına müsahibəsi

- Öncə "Qarabağ"ın "Neftçi" üzərindəki qələbəsiylə bağlı fikirlərinizi bilmək istərdik...
- Təəssüf ki, bunu edə bilməyəcəyəm. Bizə "Qarabağ" haqda suallara cavab vermək olmaz. Amma yığma barədə danışa bilərik.

- "Şaxtyor"la oyundan nə gözləyirsiniz?
- Bizi asan oyun gözləmir. Yaxşı futbol sərgiləmək lazımdır. Nəticə də vacibdir. Amma bizdə yeni komanda formalaşdırılır. Azarkeşləri sevindirməyə çalışacağıq.

- Robert Prosineçki ilə danışa bilmisiniz?
- Bilirik ki, baş məşqçi bizə ümid bəsləyir. O, ağıllı məşqçi təsiri bağışlayır. Müzakirələrə açıq insandır. Onun futbola münasibəti bizim ürəyimizcədir.

- Donetsk təmsilçisi ilə oyun nə dərəcədə vacibdir?
- Biz Malta ilə oyuna hazırlaşırıq. Ona görə də "Şaxtyor"la qarşılaşma bu baxımdan az əhəmiyyət daşımır. Düzdür, legionerlərimiz, "Neftçi"nin futbolçuları bizimlə deyil. Amma bütövlükdə heyətimiz yaxşıdır. Yaxşı oyun sərgiləməliyik.

- Antalyadan yenicə qayıtmışdınız. Klubla toplanışdan sonra yığma ilə yenidən buraya toplanışa gəlmək bezdirici deyil?
- Xeyr, yığmada olmaq həmişə xoşdur. Antalyaya artıq alışmışıq. Hər il gəlirik.