Samir Musayev: Qarabağ Neftçiyə qalib gələcək

Azərbaycan yığmasının sabiq hücumçusu Samir Musayev Topaz Premyer Liqasının 23-cü turunun oyunları ilə bağlı proqnozlarını açıqlayıb. Azerisport.az sizi həmin açıqlamalarla tanış edir.

"Qəbələ" - "Xəzər Lənkəran"
Maraqlı oyun olacaq. Hər iki komanda son dövrlər yaxşı günlər keçirmir. "Qəbələ" rəqibi oyunçularının səviyyəsinə görə üstələyir. Ona görə də düşünürəm ki, meydan sahibləri qələbə şansını əldən verməyəcəklər. Amma lənkəranlıların da gəncləri özlərini göstərməyə çalışacaqlar.

"Neftçi" - "Qarabağ"
Bu oyuna diqqət daha böyük olacaq. Bizi maraqlı və gərgin oyun gözləyir. "Qarabağ" ilk pillədəki yerini qorumağa çalışacaq ki, çempionluğunu vaxtından öncə təmin etsin. "Neftçi" isə məğlub olacağı halda çempionluq şansını itirə bilər. Ona görə bakılıları da ancaq qələbə qane edəcək. Mümkündür ki, bizi mövsümün ən maraqlı oyunu gözləyir. Amma mənim fikrimcə, "Qarabağ" "Neftçi"ni məğlub edəcək.

"Simurq" - "Sumqayıt"
"Simurq" avrokuboklarda oynamaq istəyindədir. Ona görə də bu yolda "Sumqayıt"a da qalib gəlməyə çalışacaqlar. Zaqatala klubunu çətin sınaq gözləsə də, bu komandanın qalib gələcəyini düşünürəm.

AZAL - "İnter"
Qış fasiləsindən sonra AZAL daha yaxşı oynamağa başlayıb. Bu komanda "Qarabağ"la birgə ən baxımlı futbol sərgiləyən kollektivdir. Əminəm ki, "İnter"ə qarşı maksimum güc sərf edəcəklər. Amma favorit qonaqlardır.