Erik Ramos: Əliyar Ağayev bizimlə oyunda Qarabağa üstünlük verəcək

"Neftçi"nin yarımmüdafiəçisi Erik Ramosun azerisport.az saytına müsahibəsi

- "Qarabağ"la oyundan nə gözləyirsiniz?
- Bizi ölkənin ən yaxşı komandası ilə oyun gözləyir. Bu, liderlə aradakı xal fərqini azaltmaq üçün son şansdır. Ona görə də qələbə bizə hava-su kimi lazımdır.

- Deməli, bu qarşılaşmanı çempionluq yolunda həlledici sayırsınız?
- Bəli. Əgər uduzsaq, xal fərqi daha da böyüyəcək. "Qarabağ" çox yaxşı komandadır. Ona görə də onların bu qədər xal itirəcəyinə ümid bəsləməyə dəyməz. Qarşımızda bir hədəf var - qələbə qazanmaq.

- Məğlubiyyət halında nəyin uğrunda mübarizə aparacaqsınız?
- Biz Azərbaycan Kubokunda da mübarizəni davam etdiririk. Həm də gümüş medalları qazanmaq şansımız da var.

- "Neftçi" "Qarabağ" üzərində qələbə qazanmağa ümid verən futbolu sərgiləyir?
- "Xəzər Lənkəran" və "Qəbələ" ilə oyunlarda pis təsir bağışlamadıq. Düzdü, hər iki matçın əvvəli istədiyimiz kimi keçmədi. Amma sonradan qələbəni təmin edə bildik. Ağdamlılar isə daha təhlükəli və çətin rəqibdilər. Oyuna daha ağıllı start verməliyik.

- "Qarabağ"ın heyətində kimə qarşı oynamaq daha çətindir?
- İlk növbədə Reynaldo və Almeydanı qeyd edərdim. Çox təhlükəli futbolçulardır. Həmçinin Rəşad Sadıqovla Qara Qarayevi də qeyd edə bilərəm. Onlar bu komandanın ən yaxşı yerli oyunçularıdır.

- "Simurq"la oyununuzu idarə etmiş və narazı qaldığınız Əliyar Ağayevin "Qarabağ"la da matça təyinat almasını necə qarşıladınız?
- Onun həmin oyundakı idarəçiliyi doğrudan da yaxşı olmamışdı. Sarı vərəqəni sağa-sola xərcləyirdi, tez-tez rəqibin lehinə fit səsləndirirdi.

- Bu, prinsipial oyunda "Neftçi"yə mane olmayacaq?
- Mənə elə gəlir ki, Ağayev bu dəfə də "Qarabağ"a üstünlük verəcək.