Vaqif Sadıqov namizədliyindən danışdı

Xəbər verdiyimiz kimi, Peşəkar Futbol Liqası tərəfindən hazırda Məşqçilər Komitəsinin sədri vəzifəsində çalışan Vaqif Sadıqovun İcraiyyə Komitəsinin üzvlüyünə namizədliyi irəli sürülüb. Azerisport.az saytına açıqlamasında Vaqif Sadıqov İK-ya namizədliyinin Peşəkar Futbol Liqasına “Sumqayıt” Futbol Klubundan verilməsinə münasibət bildirib:

"Bir neçə gün öncə keçirilən iclasda mənim namizədliyim gündəmə gətirildi. Bu gün isə xəbər verdilər ki, mən "Sumqayıt" tərəfindən İK üzvlüyünə namizəd göstərilmişəm. Mənu bu şəhərlə çox şey bağlayır. Ona görə də bu komandanı İK-da təmsil etməyə şad olaram. Namizədliyim dəstəklənsə, indiyə qədər olduğu kimi, bundan sonra da ölkə futbolunun inkişafı üçün əlimdən gələni edəcəyəm. Fikrimcə, bu, böyük şərəfdir. Namizədliyim martın 6-da keçiriləcək AFFA İcraiyyə Komitəsinin iclasında təsdiqlənəcək".

İK üzvü olacağı halda, Klublar Komitəsindəki vəzifəsindən də danışan Sadıqov bunları qeyd edib: "Düzünü deyim ki, bu barədə söhbətimiz olmayıb. İstənilən halda biz həmişə məşqçi olaraq qalırıq. Əsas odur ki, Azərbaycan futbolunun inkişafına xidmətimizi davam etdiririk".