Əfran İsmayılov: Bakının oyunçuları mənə dedi ki, ciblərində pul yoxdur
"İnter"in yarımmüdafiəçisi Əfran İsmayılovun azerisport.az saytına müsahibəsi
- "Bakı" üzərində 4:0 hesablı qələbənizlə bağlı nə deyə bilərsiniz?
- Belə komandalara qarşı oyunlara psixoloji cəhətdən hazırlaşmaq çətin olur. Amma bizə qələbə qazanmaq və xal ehtiyatımızı artırmaq vacib idi. Avrokuboklarda oynamaq üçün qələbə qazanmağa borclu idik. Fikrimcə, bu, bizdə yaxşı alındı.
- Bu, sizin "İnter"də ilk rəsmi oyununuz idi...
- "İnter"in yoxlama oyunlarında oynamışdım, qol da vurmuşdum. Şadam ki, ilk rəsmi oyunumda dubla imza atdım. Üzərimdə çox çalışıram. Əvvəlki səviyyəmə qayıtmaq istəyirəm. Bununla kifayətlənməyəcəyəm. Bundan sonrakı oyunlarda da özümü yaxşı tərəfdən göstərməyə çalışacağam.
- Keçmiş komandanızın qapısına iki qol vurdunuz...
- Əlbəttə, sabiq klubumun belə vəziyyətə düşməsi üzücüdür. "Bakı"dakı uşaqlarla söhbət etdim və mənə dedilər ki, onların hətta ciblərində pulları da yoxdur. Klubun o cür rəhbərliyi, infrastrukturu var, amma belə problemlərlə üz-üzədirlər. Bu, məni məyus edir. Ümid edirəm ki, "Bakı"nı da əvvəlki səviyyəsinə qaytara biləcək biri tapılacaq.
- Turnir cədvəlindəki mövqeyinizlə bağlı nə deyə bilərsiniz?
- Hazırda "Qarabağ" liderdir və onlar buna layiqdirlər. Biz isə "Neftçi"ni 3 xal qabaqlayarıq. Bu da bizim arxayınlaşmağımıza imkan vermir.
- Mövsümün sonunda da ikinci yerdə qalsanız, bu, komanda üçün uğur sayılacaq?
- Bəli. Komanda avrokuboklara vəsiqə qazanmaq istəyir. Əgər sonda gümüş medalları da əldə edə bilsək, bunu uğur saymaq olar. Amma bunun üçün hələ çox çalışmalıyıq. Çünki rəqiblərimiz də buna imkan verməmək üçün əllərindən gələni edəcəklər. Bizi ikinci pillədən sıxışdırmağı arzulayanlar az deyil.
- Yığmanın fevral toplanışına dəvət almamısınız?
- Eşitmişəm ki, çağırmaq istəyirlər. Amma rəsmi dəvət elan olunmayıb. Əgər çağırsalar, gedəcəyəm. Dəvət almasam da, klubumda öz üzərimdə daha çox çalışacağam ki, sonrakı toplanışlara çağırılım. Seçmə mərhələnin Malta ilə oyununa dəvət alanlar arasında olmaq istəyirəm.
