Flavinyo: Qarabağın liderliyi əldən verəcəyinə düşünmürəm

"Neftçi"nin yarımmüdafiəçisi Flavinyonun azerisport.az saytına müsahibəsi

- Qış fasiləsindən sonra uğursuz çıxış edən "Qəbələ" ilə "Neftçi"nin öz aralarındakı oyunda 4 qol vurması nə ilə bağlıdır?
- Komanda çox dəyişib. Mənə elə gəlir ki, "Qəbələ" bir qədər qapalı futbol oynayırdı. Bu gün isə onlar açıldılar, beş yarımmüdafiəçi ilə oynayırdılar. Məncə, baxımlı futbol alındı. Hər iki komandanın qələbə qazanmaq şansı var idi.

- "Qarabağ"la oyundan nə gözləyirsiniz?
- Onlardan 10 xal geri qalırıq. Ona görə də mütləq qələbə qazanmalıyıq ki, intriqa yaransın. Düşünmürəm ki, "Qarabağ" ardıcıl 3-4 oyunda uduzub, bizim onları qabaqlamağımıza imkan versin. Amma istənilən halda mübarizə aparmalıyıq.

- Yəni, siz "Qarabağ"ı çempion görürsünüz?
- Xeyr, sadəcə, "İnter" onlara bizdən daha yaxındır. Bizim də oxşar şansımız var idi. Amma AZAL-a uduzduq, digər görüşlərdə xallar itirdik. "Qarabağ" və "İnter" isə itkisiz irəliləyir.

- Hansı komanda çempionluğa layiq oyun sərgiləyir?
- Bunu müzakirə edə bilmərəm. Fikrimcə, "İnter"in də çempion olmaq şansı var. "Qarabağ"ın da qarşıda çətin oyunları var. Amma onlar belə oynamağa davam etsələr, çətin olacaq.

- Qəbələdə oynayan futbolçular həmişə burada oskigen çatışmazlığından gileylənirlər...
- Elədir. Boliviyadakı stadionlara oxşayır. Beş ildir bura gəlirəm və hələ də alışa bilməmişəm.

- Çempionatımızın səviyyəsinin aşağı düşdüyü barədə fikirlərlə razısınız?
- Mənfi məqamlardan biri "Araz Naxçıvan"ın çempionatı tərk etməsi oldu. Komandalar onsuz da az idi, hazırda isə doqquzu qalıb. Deyilənə görə, növbəti mövsümdən klub sayı artacaq. Mənə elə gəlir ki, yerli futbolçuların səviyyəsi qalxıb. Amma klub sayı artmalıdır ki, maraq da böyük olsun.