Ruslan Qurbanov: Bu gün Haydukla müqavilə imzalayacağam
Azərbaycan yığmasının və "Neftçi"nin hücumçusu Ruslan Qurbanov azerisport.az saytına müsahibəsində Xorvatiyanın "Hayduk" klubuna mümkün keçidindən danışıb.
- Siz artıq Xorvatiyadasınız?
- Xeyr, hələ Bakıdayam.
- Niyə?
- Dünən Xorvatiyaya uçmalıydım. Amma viza ilə bağlı problem yarandı. Hazırda onun həlli ilə məşğuluq.
- Xorvatlarla artıq müqavilə imzalamısınız?
- Bu, problem deyil. Bu gün müqavilə bağlamağa hazırlaşıram. Amma ora gələn həftənin ortasında yollanacağam.
- Müqavilənin detalları necədir?
- Məni dörd aylıq icarəyə götürürlər. Ondan sonrasına baxacağıq. Bu gün müqaviləyə imza atacağam.
- Komandanızın üçüncü yerdə getdiyini bilirsiniz? Əgər çempion olsanız, Çempionlar Liqasında oynaya bilərsiniz...
- Allah eləsin (gülür). Mənim xaricdə oynamaqla özümü göstərmək istəyim çoxdur.
- Xorvatiyada qalmaq arzunuz var?
- Əlbəttə, var. Bu, mənim üçün tramplin olacaq ki, Avropanın daha yaxşı klublarında oynamaq şansı qazanım.
- Sizin "Hayduk"a keçidinizə Robert Prosineçki kömək edib?
- Düzünü deyim ki, bundan xəbərim yoxdur. Xorvatiyadan "Neftçi"yə rəsmi məktub göndərildiyini bilirəm.
