Ağayev: Beşiktaşa qarşı oyunumla heç kimə nəyisə sübut etmək istəmirəm
Azərbaycan yığmasının və Türkiyənin "Kayserispor" klubunun qapıçısı Kamran Ağayevin azerisport.az saytına müsahibəsi
- Türkiyə Kubokunda "Beşiktaş"a qarşı forma geyəcəyinizi bilirdiniz?
- Bəli, heyət oyundan bir gün öncə açıqlanmışdı. Fikrimcə, məni belə bir oyunda qapıya qoymaqları böyük bir iş idi. Çünki cəmi 10 gün idi komandayla birlikdəydim. Heç təlim-məşq toplanışlarında da iştirak etməmişdim.
- "Beşiktaş" üzərində qələbə ilə bağlı nə deyə bilərsiniz?
- Vacib qələbə qazandıq. Ən əsası da buna layiq idik. Buradakı futbolun səviyyəsi bizim ölkədəkindən yüksəkdir. Mən buradakı atmosferi yığma komandamızın oyunlarındakı ab-hava ilə müqayisə edə bilərəm. Sevindiricidir ki, Türkiyə Super Liqasının liderinə qalib gəldik. Şadam ki, "Kayserispor" kimi komandada çıxış edirəm. Ola bilər ki, bu komanda hazırda 1-ci liqada çıxış edir, amma öz ənənələri var.
- Debütünüzü uğurlu saymaq olar?
- Qələbə qazandıq, qol buraxmadıq. Fikrimcə, hər şey normal alındı. Amma bu oyun artıq geridə qaldı. "Beşiktaş"a qarşı oyunumla heç kimə nəyisə sübut etmək istəmirdim və etməyəcəyəm. Həyat davam edir, inkişaf etməliyik.
- Növbəti mövsümdə komandanızı Super Liqada görə biləcəyik?
- "Kayserispor" liderdir və ümid edirəm ki, bu mövqeyini qoruyar. Mənim də Super Liqada oynamaq istəyim var.
- Azarkeşlərlə münasibətiniz necədir?
- Mənim Azərbaycanda da azarkeşlərlə münasibətim yaxşı idi. Daha konkret olaraq kimlərisə söymək üçün stadiona gələn bir qrup fanatlarla yox. "Xəzər Lənkəran", "Bakı" və "Qəbələ" azarkeşlərini heç vaxt unutmayacağam. Kayseriyə gəlincə, burada ölkəmizi təmsil edirəm. Münasibətlərimiz də yaxşıdır. Burada futbolu sevirlər, futbolla yaşayırlar.
- Komandada rəqabət necədir?
- Belə ciddi klublarda rəqabətdən qaçmaq mümkün deyil. Kifayət qədər yaxşı qapıçılar var. Kim daha yaxşı hazırlıqlıdırsa, o da oynayacaq. Hazır olmaq lazımdır. Amma uyğunlaşmaq üçün vaxt lazımdır.
- Sizi komandada necə qarşıladılar?
- Əla. Elə təəssürat var ki, mən uzun müddətdir burada çıxış edirəm. Mənə böyük hörmət göstərirlər.
