Məsimov: Qarabağın qalib gəlməsi bizim üçün pis olsa da, onlarla hələ iki oyunumuz var

"Neftçi"nin yarımmüdafiəçisi Samir Məsimov Topaz Premyer Liqasının 21-ci turu çərçivəsində "Xəzər Lənkəran"a qarşı keçirdikləri oyundan sonra jurnalistlər üçün brifinq keçirib. Azerisport.az sizi həmin müsahibə ilə tanış edir.

- Öncə oyunla bağlı fikirlərinizi bilmək istərdik.
- Bu oyun bizim üçün çox vacib, hətta deyərdim həlledici idi. Qış fasiləsindən sonrakı oyunlarda qələbə qazana bilmirdik. Bu gün qələbə qazandıq. Psixoloji cəhətdən bu qələbənin komandamıza faydası böyük olacaq.

- Bundan sonrakı oyunlarda "Neftçi"də hər şeyin qaydasında olacağını gözləmək olar?
- Məşqlərdə çalışırıq ki, hər şey qaydasında olsun. Artıq əvvəlki inamı qaytarmış olduq.

- "Neftçi"nin zirvəni ələ keçirməsi nə dərəcədə inandırıcıdır?
- Biz hələ 100 faiz hazır deyilik ki, liderlik uğrunda mübarizə aparq. Xal fərqi kifayət qədər böyükdür. İndicə öyrəndim ki, "Qarabağ" da qalib gəlib. Bu, bizim üçün pisdir. Amma qarşıda onlarla da iki oyunumuz var və liderə çatmağa çalışacağıq. Güzəştə getməyəcəyik.

- Sizə elə gəlmir ki, qələbəyə baxmayaraq, "Neftçi" zəif oynadı?
- Bu gün uşaqlarda həyacan hiss olunurdu və bir qədər yaxşı formada deyildilər. Amma bu qələbədən sonra daha da irəli getməyə çalışacağıq.

- Siz qol vurduqdan sonra niyə ehtiyat oyunçular skamyasına qaçıb orada əyləşdiniz?
- Mən ehtiyat oyunçular skamyasında çox vaxt keçirmişəm və qoldan sonra da bir qədər özümü itirdim. Buna görə də ehtiyat oyunçular skamyasında oturmağa getdim.

- Ola bilər ki, bununla siz baş məşqçiyə onu ehtiyatda oturtmasına etirazınızı bildirirdiniz?
- Xeyr, mənim vəzifəm meydana çıxıb öz oyunumu sərgiləməkdir. Əsas heyətdə çıxmağa layiq olduğumu öz oyunumla göstərə bilərəm.

- "Qəbələ" ilə növbəti oyunda sizi əsas heyətdə gözləyək?
- Buna baş məşqçi qərar verir. Məşqlərdə çalışacağam ki, baş məşqçinin etimadını qazanım və məni əsas heyətdə meydana buraxsın.