Emin Ağayev: Çətin ki, azərbaycanlı futbolçular Rusiya ikinci liqasında az maaşla oynamğa razı olsun
Rusiyanın "Volqa" klubunun baş məşqçisi, Azərbaycan yığmasının sabiq müdafiəçisi Emin Ağayevin azerisport.az saytına müsahibəsi
- Sizi "Volqa"nın baş məşqçisi təyin olunmağınız münasibəti ilə təbrik edirik!
- Çox sağ olun! Mənimlə çoxdan danışıq aparırdılar. Hələ mövsümün əvvəlindən bu komandanı çalışdıra bilərdim. Amma o vaxt "Domodedovo"da çalışırdım və məni hər şey qane edirdi. Sonradan vəziyyət dəyişdi və yenidən təklif gəldi. "Volqa" mənim üçün doğma klubdur. Çünki karyeramı məhz bu klubda başa vurmuşam. Tverdə məni hər kəs tanıyır, hamı hörmət edir. Klubun təklifi məni qane etdiyi üçün qayıtmağa qərar verdim.
- Qarşınıza hansı vəzifə qoyulub?
- Bu mövsüm üçün demək olar ki, ciddi bir hədəfimiz yoxdur. Mümkün qədər üst pillələrdə qərarlaşmağa çalışacağıq. Müqaviləm ilyarımlıqdır. Ona görə də əsas hədəfimizi növbəti mövsüm üçün müəyyənləşdirəcəyik.
- Azərbaycan klublarından təklif almamışdınız?
- Düzünü desəm, heç bir təklif yox idi. Amma alsaydım, xoş olardı. Orada çalışmağın əleyhinə olmazdım.
- Azərbaycandan kimlərlə əlaqə saxlayırsınız?
- Vəli Qasımovla, Dmitri Kramarenkoyla, Elxan Həsənovla danışıram.
- Azərbaycan futbolunu izləyirsiniz?
- Kifayət qədər diqqətlə izləyirəm. Bütün hadisələrdən xəbərim var. Ötən ilin sonunda yığma komandanın baş məşqçisi dəyişdi. Azərbaycanın U-17 və U-19 yığmalarının Avropa çempionatının elit mərhələsinə çıxmasından da xəbərim var.
- Bəs klub səviyyəsindəki uğurlarımız barədə nə deyə bilərsiniz?
- "Qarabağ"la "Neftçi"nin çıxışını mütəmadi izləyirdim. Düzünü desəm, ağdamlıların çıxışını daha maraqla izləyirdim. Çünki bu komanda doğrudan da böyük irəliləyişə nail olub. Qurban Qurbanov mənə yaxın adamdır. Onunla birgə oynamışıq. Hərdən imkan olanda söhbətləşirik.
- Yəqin ki, "Qarabağ"ın İtaliya "İnter"i ilə ev oyununda üzləşdiyi haqsızlığa siz də üzüldünüz?
- Şübhəsiz. Komandanın Avroliqadakı çıxışını hakim səhvinə görə dayandırması üzücü idi. Amma "Qarabağ" istənilən halda tərifə layiqdi. Onlara növbəti avrokubok mövsümündə uğurlar arzulayıram.
- Perspektivdə "Volqa"ya azərbaycanlı futbolçu dəvət etmək var?
- Çətin ki, azərbaycanlı futbolçulardan hansınısa Rusiyanın ikinci liqasındakı maaşlar qane etsin. Ölkədəki böhran klublara da təsirsiz ötüşməyib.
