Elnur Məmmədov: Neftçi bu mövsüm çempion ola bilər

"Neftçi"nin vitse-prezidenti Elnur Məmmədovun azerisport.az saytına müsahibəsi

- Bu həftə mətbuatda baş məşqçi Arif Əsədovun mümkün istefası ilə bağlı xəbərlər yayıldı. Bu məsələ doğrudan da klubunuzda gündəm təşkil edir?
- Komandamız hazırda vacib bir oyuna hazırlaşır. Belə məsələlər həmişə qaldırılır. Amma mənim fikrimcə, bu tipli xəbərlər məşqçilər korpusundakı, komandadakı ab-havaya təsir etmək üçün ortaya atılır.

- Ernest Nforla bağlı vəziyyəti necə şərh edərdiniz?
- Onun əsas komandadan uzaqlaşmasının səbəbi məşqlərə münasibətidir. Məşqlərdə tam gücü ilə çalışmır. Üstəlik, o, klubun intizam qaydalarını pozub. Biz onunla söhbət etdik və müəyyən müddətə əvəzedici komandaya göndərdik.

- O, artıq əvəzedici heyətdə qol da vurmağa imkan tapıb...
-Görünür, yenidən məşqçilər korpusunun rəğbətini qazanmaq istəyir ki, əsas komandaya qayıtsın.

- Lider "Qarabağ"la aradakı xal fərqi böyüməkdədir. Hələ də çempionluq şansınızın qaldığına inanırsınız?
- "Qarabağ" necə çempionatın lideri oldusa, biz də mövsümü çempion kimi başa vura bilərik. Çünki qarşıda hələ çox oyun var. Əlbəttə, fərq böyükdür. Amma "Neftçi" də həmişə çempionluq uğrunda mübarizə aparan komandadır.

- Belə bir informasiya yayılıb ki, "Neftçi"nin bazası dövlətin planında olan torpaqlara düşür və buna görə oranı tərk etməli olacaqsınız. Bu xəbər nə dərəcədə doğrudur?
- Bizə bununla bağlı heç bir rəsmi sənəd gəlməyib. Bunu ancaq jurnalistlər deyirlər.