Vaqif Sadıqov: Hamımızın bir hədəfi var - AÇ-2020!
AFFA-nın məşqçilər şurasının rəhbəri Vaqif Sadıqovun azerisport.az saytına müsahibəsi
- Gənclərdən ibarət yığmamızın AÇ-2017-nin seçmə mərhələsindəki rəqibləri müəyyənləşdi? Millinin düşdüyü qrupla bağlı nə deyə bilərsiniz?
- Bu gün Avropada zəif komanda yoxdur. Fikrimcə, istənilən halda döyüşkən komanda formalaşdırıb, qarşıya qoyulan hədəfə çatmaq lazımdır. Hamımız yaxşı nəticə gözləyəcəyik. Həm də U-21 əsas millimizin ehtiyatıdır. İndi orta yaş həddi 27-28 olan komandalar daha yaxşı nəticələrə imza atırlar. Bu o deməkdir ki, AÇ-2020-nin oyunlarında iştirak edəcək Azərbaycan yığmasının əsasını məhz indiki gənclər millimizin üzvləri təşkil edəcəklər. Ümidlərimiz böyükdür.
- Rəqiblər baxımından bəxtimizin gətirdiyini demək olar?
- Kimin bəxtinin gətirdiyi barədə düşünmək lazım deyil. Bu rəqiblərin hamısı ilə seçmə mərhələlərdə üz-üzə gəlmişik. İlk növbədə əvvəlkilərdən də yaxşı nəticələr qazanmaq barədə düşünməliyik.
- Qarşıdakı tsikli U-21-in baş məşqçisi Yaşar Vahabzadə üçün ilk ciddi sınaq saymaq olar?
- Mən belə deməzdim. O, bundan öncə də gənclərdən ibarət yığmada çalışırdı. Əgər biz hər şeyi bu komandadan gözləsək, onda heç nəyə nail ola bilmərik. Biz yalnız o halda uğura nail ola bilərik ki, birləşək, hər kəs öz vəzifəsinin öhdəsindən layiqincə gəlsin. Artıq güclü oyunçularımız, çempionatımız var. Hamımızın da hazırda bir hədəfi var - AÇ-2020.
- U-21-in sabiq üzvü Şamil Qurbanovun Ermənistanın "Uliss" klubuna baxışa yollanmasını necə qarşıladınız?
- Mənə elə gəlir ki, buna bizim heç şərh verməyimiz də lazım deyil. Bu gün öz ölkəsini, yığmasını sevənlərin hamısı bizim yanımızdadır.
- U-19-un baş məşqçisi Nikolay Adama Hindistandan gələn təkliflə bağlı nə deyə bilərsiniz?
- Biz hələ buna diqqət ayırmamışıq. Əsas məsələ qarşıdakı AÇ-nin elit mərhələ oyunlarına yaxşı hazırlaşmaqdır. O, Azərbaycana yenicə qayıdıb və biz onunla görüşmüşük.
