Georgi Nikolov: Baş məşqçi postuna iki namizəd var ki, İnteri çalışdırmağa razılıq veriblər

"İnter"in prezidenti Georgi Nikolovun azerisport.az saytına müsahibəsi

- Ötən gün klublar komitəsinin növbəti iclası keçirilib. Görüş necə keçdi?
- Sevindiricidir ki, görüşün əvvəlində AFFA-nın baş katibi Elxan Məmmədov da iştirak etdi, bizim arzularımızı dinlədi. Əsas odur ki, AFFA yeni yaradılan bu komitə ilə əməkdaşlığa isti yanaşır. Aydın məsələdir ki, səsləndirilən bütün təkliflər qəbul olunmayacaq. Amma ən azı 50 faizi qəbul olunsa, Azərbaycan futbolunun xeyrinə işləyəcək. 21 yaşadək futbolçuların qazancı ilə bağlı müzakirələr aparıldı. Eyni zamanda belə futbolçuların bir klubdan digərinə transferi ilə də bağlı müəyyən fikirlər səsləndirildi. Premyer Liqanın əsas sponsoru Topazla əməkdaşlığın davam etidirilməsi, teleyayımla da bağlı müzakirələr aparıldı. Sonda isə legioner limitini müzakirə etdik.

- Sizin təklifiniz necə oldu?
- Bu məsələ ilə bağlı "İnter"in fikri belədir ki, legioner limiti necə olmasından asılı olmayaraq, ən azı üç il qüvvədə qalmalıdır. Hər il limiti dəyişdirmək düzgün deyil.

- "İnter" klublar komitəsinin yaranmasından bəri ondan nə kimi fayda görüb və bundan sonra nəyə ümid edir?
- Bu gün üçün heç bir fayda görməmişik. Heç özümüz üçün fayda da axtarmırıq. Əgər hər klub özü üçün fayda axtarırsa, onda bu komitənin yaranması da mənasız olar. Əsas hədəf Azərbaycan klubları arasındakı münasibətləri daha da yaxşılaşdırmaqdır. Mən hətta düşünürəm ki, yaxın gələcəkdə birinci divizion klubları da bu komitəyə qoşulmalıdırlar. Çünki onlar da peşəkar klub olaraq, bu müzakirələrdə yaxından iştirak etməlidirlər.

- Peşəkar Futbol Liqası ilə fikir ayrılığının yaranacağını düşünmürsünüz ki?
- Ola bilər ki, PFL bizim əksər fikirlərimizlə razılaşmasın. Amma bunu münaqişəyə çevirməkdə məna görmürəm. PFL ən azı bizim fikirlərimizi eşitməlidir.

- Baş məşqçi axtarışlarınız necə gedir?
- Bu həftə klubun sahibi ilə görüşüb, gələcək namizədlərlə bağlı fikir mübadiləsi aparacağıq.

- Neçə namizəd var?
- Artıq iki namizəd var. Onlar ilkin razılıq veriblər. Adlarını çəkməyəcəyəm. Amma əcnəbi olduqlarını deməliyəm.

- "Sumqayıt"la heç-heçə sizi məyus etdi?
- Mən bu heç-heçəni gözləmirdim. İlk oyunlarda belə çətinliklər olur. Həm də toplanış zamanı yaxşı nəticələr qazandığımız vaxt, rəsmi oyunlara pis başlayırıq. Amma məşqçilər korpusu bu barədə düşünüb, vəziyyəti düzəltməlidirlər.