Vüqar Nadirov: Azərbaycan çempionatı A Seriyası deyil ki, özümüzü çempion sayaq
"Qarabağ"ın hücumçusu Vüqar Nadirovun azerisport.az saytına müsahibəsi
- Türkiyəyə hamıdan öncə gedə Vüqar Nadirovun daha yaxşı hazırlaşdığını demək olar?
- Pis və ya yaxşı olduğunu deyə bilmərəm, amma çalışdım. Fikrimcə, qiyməti Premyer Liqa oyunları verəcək. İlk oyunumuz "Bakı"ya qarşı olacaq. Çətin oyun olacaq. Uğurlu oynamaq lazımdır.
- "Qarabağ" altı yoxlama oyununda cəmi 4 qol vurdu. Bu, nədənsə xəbər vermir?
- Bunlar sadəcə, yoxlama oyunları idi. Motivasiya da həmin motivasiya deyildi. Premyer Liqa oyunlarında isə elə olmayacaq. Daha dəqiq olmağa çalışacağıq.
- İnnosent Emeqara komandadan getsə də, "Qarabağ" yeni hücumçu almadı. Doğrudan, hücumçuya ehtiyac yoxdur?
- Mən bunu müzakirə edə bilmərəm. Çünki özüm də futbolçuyam.
- İstənilən halda, bir oyunçu olaraq qol vurmağı bacaran forvardla birgə oynamağın daha asan olduğunu düşünmürsünüz?
- Əlbəttə, elə daha asandır. Yəqin ki, yaxşı hücumçu olmayıb, komandamıza layiq olanını tapa bilməyiblər. Amma belə hərdən mən, hərdən Reynaldo həmin mövqedə çıxış edir. Elə də pis alınmır.
- Emeqara Azərbaycanda dil problemi ilə üzləşdiyini bəyan edib...
- Mən onda belə bir problem hiss etməmişdim. O, ümumiyyətlə, xaraktercə sakit adam idi və az ünsiyyət qururdu. Hərdən hətta zarafat da edirdi.
- Toplanışda əvəzedici komandadan da xeyli oyunçu var idi. Rəqabət artıb?
- Tədricən artır. Hazırda heyətimizdə yaxşı uşaqlar var. Fikrimcə, yaxın gələcəkdə xeyli yaxşı gənclər üzə çıxacaq.
- Əsas izləyicilərinizdən "İnter"lə "Neftçi"nin üçüncü dövrəyə xal itkisi ilə başlamasını necə qarşıladınız?
- Mövsüm asan keçməyəcək. Hələ seviniləsi heç nə yoxdur. Həmin "Sumqayıt" və AZAL ilə bizim də oyunlarımız var. Heç kim xal itkisindən sığortalanmayıb.
- Ehtiyatdakı oyunları da nəzərə alsaq, hazırda əsas rəqiblərinizi 7-8 xal qabaqlayırsınız. İtaliyada "Yuventus"un "Roma"nı 7 xal qabaqlaması artıq çempionluğun taleyinin həll olunması kimi qəbul olunur...
- Bura İtaliya deyil. Bizdə hər şey o dərəcədə asan deyil. Qarşıda 18 oyun var. Bizim neçə xal itirəcəyimiz hələ bəlli deyil.
