Freddi Mombonqo: Neftçini mən yox, AZAL məğlub etdi
AZAL-ın hücumçusu Freddi Mombonqonun azerisport.az saytına müsahibəsi
- "Neftçi" üzərində qələbə ilə bağlı nə deyə bilərsiniz?
- Uğurlu oynadıq. İlk dəqiqədən sonadək meydanda yaxşı təsir bağışladıq. Layiqli qələbə qazandıq. Son dəqiqələrdə həlledici qol vuraraq qalib gəlmək çox xoşdur.
- Üçüncü dövrəyə uğurlu başladınız. Hədəfiniz nədən ibarətdir?
- Start kifayət qədər möhtəşəm alındı. Artıq hər şey öz əlimizdədir. Qələbə qazanmağa davam etmək istəyirik. Buna nail olsaq, qarşıya qoyulan vəzifəyə çatmağımız da mümkün olacaq. Hədəf isə Avropa Liqasında iştirak etməkdən ibarətdir.
- Özünüzü bu oyunun qəhrəmanı sayırsınız?
- Qəhrəman? Xeyr, qəhrəman deyiləm. Biz bir komandayıq, qəhrəman yoxdur. "Neftçi"ni də mən yox, AZAL-ın meydana çıxan 11 futbolçusu məğlub etdi. Yaxşı çalışdıq, faydasını gördük. Komandama faydalı olduğuma görə də şadam. Komanda yoldaşlarım olmasaydı, mən də bu qolları vura bilməzdim.
- Əvvəlki iki dövrə ərzində üç qol vurmuşdunuz. Üçüncü dövrənin ilk matçında dubla imza atdınız. Bombardirlik uğrunda mübarizə aparacaqsınız?
- Burada ilk mövsümümü keçirirəm. Ona görə də hücumçu üçün elə də böyük göstərici sayılmayacaq sayda qol vurmağım təəccüblü sayılmamalıdır. Təbii ki, zaman keçdikcə özümü burada daha yaxşı hiss etməyə başlayıram. Ümid edirəm ki, bundan sonra komandama daha çox fayda verəcəyəm.
- Növbəti mövsümdən daha iddialı klublarda oynamaq hədəfiniz var?
- Hazırda bu barədə düşünmürəm. Çünki AZAL-da qollar vurmaq istəyirəm. Əgər burada qollar vurmağa davam etsəm, yeni imkanlar da açılacaq. İndidən başqa komandaya keçmək barədə düşünməyə başlasam, bundan nə mən fayda görəcəyəm, nə də komandam.
- Tərlan Əhmədovla çalışmaq necədir?
- O, gənc mütəxəssisdir və onunla çalışmaq mənə xoşdur. İlk günlərimdə mənimlə tez-tez maraqlanırdı, kömək edirdi. Belə məşqçini sevməmək olmaz.
- Qarşıda "Qəbələ" ilə oyun var...
- Şans qazansam, öz oyunumla ümidləri doğrultmağa çalışacağam. Bu, adi səfər oyunu olmayacaq. Bizim üçün növbəti çağırış olacaq. Yenə komandama faydalı olmağa çalışacağam. Belə olan halda mümkündür ki, növbəti mövsümdə daha böyük komandalarda oynamaq şansım da olacaq.
