Premyer Liqada 8-ci ukraynalı
Topaz Premyer Liqasının 19-cu turu “Qəbələ”nin baş məşqçisi Roman Qriqorçukun Azərbaycan çempionatında debütü ilə əlamətdar olub. Azerisport.az xəbər verir ki, 50 yaşlı mütəxəssisin ilk oyununda onun yetirmələri səfərdə “Bakı”ya 2:0 hesabı ilə qalib gəlib.
Bununla da Qriqorçuk Premyer Liqa tarixinə 8-ci ukraynalı kimi düşüb. Onadək ölkəmizdə çalışan 7 mütəxəssisdən 3-ü “İnter”in baş məşqçisi olub. Valentin Xodukin 80, Anatoli Konkov 50, Oleq Smolyaninov 6 qarşılaşmada paytaxt təmsilçisinə rəhbərlik edib. Ukraynalılar arasında oyun sayında rekordçu isə “Simurq”u 108 matça çıxaran Roman Pokoradır. Adıçəkilən mütəxəssislərdən başqa İqor Nakoneçnı “MKT-Araz”da 50, Anatoli Demyanenko “Neftçi”də 16, Viktor Pasulko “Xəzər Lənkəran”da 13 çempionat matçında iş başında olub.
Ümumiyyətlə isə türkiyəli Naci Şensoyun ilk legioner baş məşqçi kimi futbol tariximizə düşdüyü 2001/02 mövsümündən Qriqorçukun debütünədək 50 əcnəbi Premyer Liqada çalışıb. Ukraynalı baş məşqçilərlə yanaşı, bu vəzifəni müvəqqəti icra edənlərin də yer aldığı bu siyahıya 51-ci kimi düşüb.
Bu çalışdırıcılar 19 ölkəni təmsil edir: Türkiyə -14, Ukraynanı - 8, Gürcüstan, Serbiya – 4, Almaniya – 3, Bosniya və Herseqovina, Rumıniya, Rusiya, İspaniya – 2, Xorvatiya, Uels, Moldova, İtaliya, İngiltərə, Əlcəzair, Çexiya, Makedoniya, Litva. Latviya – 1.
5 legionerin 2 komandada işlədiyini nəzərə alsaq, indiyədək 17 klub gəlmə baş məşqçiyə güvənib: “Xəzər Lənkəran” – 10, “Bakı” - 8, “Qəbələ” – 6, “İnter”, “Simurq”- 4, “Gənclərbirliyi”, “Turan”, “Neftçi”, “Rəvan”, “Standard” - 3, “Muğan”, “Olimpik” – 2, “Karvan”, “Masallı”, “MKT-Araz”, “Sumqayıt”, “Qarabağ” – 1.
Qeyd edək ki, Qriqorçuka qədər “Qəbələ”də ingiltərəli Toni Adams, türkiyəli Fatih Kavlak, rusiyalı Yuri Syomin, rumıniyalı Dorinel Muntyanu, həmçinin bu vəzifəni icra edən ispaniyalı Luis Araqon da komandaya rəhbərlik edib.
