Stamenkoviç: Ayntraxtın serb futbolçularından Emilə dəstək olmalarını xahiş etdim
"Neftçi"nin qapıçısı Saşa Stamenkoviçin azerisport.az saytına müsahibəsi
- Mövsümün qalan hissəsinə necə hazırlaşmısınız?
- Yaxşı. Xeyli yoxlama oyunu keçirdik. Əksəriyyətindən qalib ayrıldıq. Yaxşı forma toplamışıq. Baxaq, görək çempionatın startı necə alınacaq.
- Qarşıda AZAL-la oyun var...
- Qələbə ilə başlamaq lazımdır. AZAL ciddi rəqibdir və həmişə belə olub. Onları məğlub etmək çətin olacaq. Amma bunu etməyə məcburuq.
- Komanda çempionluğa köklənib?
- Artıq neçə ildir "Neftçi"dəyəm. Hələ belə mövsüm olmamışdı. Fikrimcə, sonadək mübarizə aparacağıq.
- Amma razısınız ki, komandanız əvvəlki dövrlərdəki kimi parlaq oyun sərgiləmir? Mütəxəssislər də "Qarabağ"ı favorit sayır...
- Ümid edirəm ki, mütəxəssislər səhvə yol verəcəklər. Amma ardıcıl bir neçə il eyni səviyyədə oyun sərgiləmək asan məsələ deyil. Hərdən eniş dövrü də olur. Biz də bundan qaça bilmədik. Hazırda vəziyyəti düzəltməyə çalışırıq. "Neftçi" artıq bu mövsümdən əvvəlki səviyyəsini bərpa edə bilər.
- Yeni transfer olunan Aqil Məmmədovla rəqabət aparmaq necədir?
- "Neftçi"də qapıçılarla bağlı heç vaxt problem olmayıb. Biz öz işimizi görürük. Mən Aqilə uğurlar arzuladım. Bizim aramızda heç bir problem yoxdur və ola da bilməz. Bu rəqabətimiz sadəcə, komandanın xeyrinədir.
- Sabiq komanda yoldaşınız Emil Balayevdən Almaniyanın "Ayntraxt" klubunda nə gözləyirsiniz?
- O, şübhəsiz ki, çox istedadlı qapıçıdır. Ona uğurlar arzulamışam. Vətənimdə olduğum son istirahət zamanı "Ayntraxt"da oynayan iki serbiyalı oyunçu ilə görüşdüm. Onlara dedim ki, Emilə hər cür dəstək göstərsinlər. Emil hələ gəncdir və ona ilk növbədə öz üzərində çalışmaq lazımdır. Ümid edirəm ki, Balayev orada uğur qazana biləcək.
