Kamran Quliyev: İnterdən xal almağa çalışacağıq
"Sumqayıt"ın prezidenti Kamran Quliyev komandanın hazırlıq prosesindən danışıb. Azerisport.az saytına açıqlamasında o, bunları söyləyib:
"Hazırlığın əsas mərhələsi başa çatıb. Komanda hazırda adi qaydada məşq edir, "İnter"lə oyuna hazırlaşır. Fikrimcə, Türkiyəyə getməsək də, yaxşı hazırlıq keçmişik. Çempionatdakı fasilənin elə də böyük olmadığını nəzərə alıb, ölkə xaricinə yollanmamağa qərar verdik. Hava şəraiti də bizim istədiyimiz kimi oldu. Qarşıda "İnter"lə oyun var. Mübarizə aparacağıq. Bizim üçün çətin rəqiblərdən biridir. Amma onlardan xal almağa çalışacağıq. "Bankçılar" qızıl medallara əsas namizədlərdəndir. Düşünmürəm ki, "İnter" və "Sumqayıt"ın yeni oyunçuları bu görüşdəcə qeyri-adi nəyəsə nail olacaq. Yəni rəqibi yaxşı tanıdığımızı demək olar. İlk dövrədə bu komandaya 1:5 hesabıyla uduzmuşduq, öz meydanımızda isə heç-heçəyə nail olduq. Rəqibin üstünlüyü var. Biz isə sadəcə, daha istəkli oynamaqla, bəxt sayəsində nəyəsə ümid edə bilərik. İstənilən halda, rəqibdən xal almağı, mümkün olacağı halda onlara qalib gəlməyi düşünürük".
