Branimir Subaşiç: Ola bilər ki, bizim futbolçular məşqlərdə özlərini daim göstərə bilmir

Azərbaycan yığmasının sabiq hücumçusu, hazırda Türkiyənin "Manisaspor" klubunda çıxış edən Branimir Subaşiçin azerisport.az saytına müsahibəsi

- Bəzi istisnaları çıxmaq şərtilə, azərbaycanlı futbolçular Türkiyədə sabit çıxış edə bilmirlər. Sizcə, niyə belədir?
- Bunun səbəbini izah etmək çətindir. Yəqin ki, hər birinin öz səbəbləri var. Kiməsə başqa ölkəyə alışmaq çətin olur. Baxmayaraq ki, azərbaycanlı futbolçular üçün Türkiyəyə uyğunlaşmaq elə də çətin olmamalıdır.

- Bəlkə onlar Türkiyə 1-ci liqasında oynamağı özlərinə sığışdıra bilmirlər?
- Əslində, burada hər gün, hər məşqdə əsas heyətə layiq olduğunu isbatlamalısan. Yüklənmə, stress çoxdur. Ola bilər ki, bizim futbolçular buna alışıq deyillər. Digər tərəfdən Azərbaycanda çox yaxşı maliyyə şərtləri var. Hətta Avropanın əksər komandaları ilə müqayisədə çox yaxşı müqavilələr bağlanılır. Bax buna görə də əksəriyyət doğma ölkədə oynamaq istəyir.

- Mahir Şükürovla siz hələ ki, klubunuzda daha sabit oyun sərgiləyirsiniz...
- Deməli, azərbaycanlı futbolçular xaricdə oynaya bilirlər.

- Gələcəyiniz Türkiyə ilə bağlıdır?
- Sabah nə olacağını hələ bilmirəm. Hər şey o qədər də sabit deyil. Düzünü desəm, hərdən Azərbaycan üçün darıxıram. Baxmayaraq ki, burada özümü yaxşı hiss edirəm. Bunu dəqiq bilirəm ki, Türkiyədə klubsuz qalmayacağam. Hələ də təkliflər alıram.

- Fevralda Robert Prosineçki yığmamızı ilk dəfə təlim-məşq toplanışına yığacaq. Dəvət gözləyirsiniz?
- Bu yaxınlarda mətbuatdan oxudum ki, o, legionerlərə dəvət göndərməyəcək. Amma mən yenə də dəvət alacağıma ümid edirəm. 2014-cü ildə klubumda uğurlu çıxış etsəm də, dəvət almamışdım. Bu dəfə necə olacağını bilmirəm.

- Ötən il Azərbaycan yığmasına Berti Foqts rəhbərlik edirdi, indi isə Prosineçki...
- Ümid edirəm ki, Prosineçkinin rəhbərlik etdiyi komandada mən də olacağam.