Tellur Mütəllimov: Rud van Nistelroyun sözləri məni ancaq sevindirir

"Qəbələ"nin yarımmüdafiəçisi Tellur Mütəllimovun azerisport.az saytına müsahibəsi

- Komandanızın bu toplanışı sizin üçün kifayət qədər yaxşı alındı...
- Baş məşqçi sağ olsun ki, məni hər oyunda meydana buraxır. Mən də etimadı doğrultmağa çalışıram. Artıq hazırlığın ikinci mərhələsi başlayıb. Ümid edirəm ki, toplanışın sonuna qədər mən də tam hazır olacağam.

- 19 yaşınız olsa da, əsas komandada çıxış edirsiniz. Əsas heyətdə oynamağa nə dərəcədə yaxınsınız?
- Mən hələ Dorinel Muntyanunun vaxtında əsas komandaya cəlb olunurdum. Amma əsas heyətdə oynamağa nə dərəcədə hazır olduğumu özüm deyə bilmərəm. Yəqin ki, nə vaxt hazır hiss etsələr, buraxacaqlar.

- PSV-nin ikinci komandası ilə oyundan sonra rəqib komandanın baş məşqçisi Rud van Nistelroy məhz sizin oyununuzu xüsusi vurğulamışdı...
- Onun məni tərifləməsi sadəcə, sevindiricidir. Hollandiyalı möhtəşəm hücumçu olub. Əgər o, belə sözlər deyirsə, deməli, ümidləri doğrultmaq üçün daha artıq çalışmalıyam.

- Artıq Azərbaycan yığmasının məşqçiləri də sizin oyununuzu bəyənib. Elxan Abdullayev sizi gənclərdən ibarət milliyə məsləhət gördüyünü deyib...
- Xoşdur. Yığmada oynamağı istərdim. Dəvət gözləyəcəyəm. Ondan sonra əsas heyətdə oynamaq üçün mübarizə aparmalıyam. Premyer Liqada da oynamağı çox istəyirəm.

- Sizin kimi yaxşı perspektiv vəd edən azərbaycanlı futbolçular çox olsa da, onlar sonradan tam parlaya bilmir. Sizdən nə gözləyək?
- Hər şey futbolçunun özündən asılıdır. Düşünmürəm ki, qazanacağım pul məni korlaya bilər. Yüksək səviyyəli futbol oynamaq istəyirəm.

- Hansı yerli futbolçunun çıxışı sizin daha çox xoşunuza gəlir?
- Mənim mövqeyimdə Cavid Hüseynov çıxış edir. Onun meydanda gördüyü iş xoşuma gəlir. Mənə elə gəlir ki, o, heç vaxt yorulmur.