Vaqif Sadıqov: Klublarla iş çox vacibdir

AFFA Məşqçilər Komitəsinin sədri Vaqif Sadıqov azerisport.az saytına müsahibə verib. O, görülən və görüləcək işlərdən söhbət açıb:

"Klublardakı məşqçilərlə işləyəcəyik. Onların hər birinin futbolun inkişafına dair öz maraqları, düşüncələri var. Futbolumuzun inkişafı naminə onları birləşdirmək istəyirik. Qoy hər bir məşqçi öz fikirlərini, düşüncələrini bizə təqdim etsin ki, faydalı ola biləcək hansısa ideya təkcə onun komandasına yox, bütövlükdə futbolumuza yarasın".

Yığmamızın sabiq baş məşqçisi klubların futbolun inkişafında böyük rol oynadığını qeyd edib: "Klublarla iş çox vacibdir. Çünki bütün futbolçular məhz klublarda formalaşdırılır, hazırlaşır, yığmaya da ordan dəvət alır. Ona görə də hazırda Türkiyədə olan klublarımızın heç birini diqqətdən kənarda qoymamağa çalışırıq".

Sadıqov hansısa fikir ayrılıqlarının olmasını münaqişə ilə səhv salmamağı məsləhət görür: "Hər kəsin futbola öz baxışı var. Bizim fikirlərimiz üst-üstə düşməyə bilər. Bizim problemimiz ondadır ki, fikir ayrılığı səbəbindən qruplara bölünmüşük. Amma həmin qruplar birləşməlidir. Azərbaycan futbolunun inkişafı naminə hər birimiz birləşməliyik. Artıq gənclərdən ibarət yığmalarda müəyyən inkişafa nail olmuşuq".

55 yaşlı mütəxəssis sonda bunları söyləyib: "Futbolun inkişafı ilə hər kəs məşğul ola bilər. Amma AFFA işə nəzarət etmək üçün hazırda bizi seçib. Lakin biz heç bir qərar qəbul etmirik. Son sözü yenə də AFFA deyir".