Səlahət Ağayev: Müdafiəçilərə qışqıra bilmərəm
"İnter"in qapıçısı Səlahət Ağayevin azerisport.az saytına müsahibəsi
- Türkiyənin "Kasımpaşa" klubu üzərindəki qələbə Antalya toplanışı çərçivəsində üçünücü belə uğurunudur. Deyəsən, komandanız yaxşı formadadır...
- Demək olar ki, toplanış öz axarı ilə gedir. Çempionatın qalan dövrünə gücləndirilmiş şəkildə hazırlaşıram. Son oyuna gəlincə, qələbəni çətinliklə qazandıq. Belə yaxşı nəticə qazanmağımız təbii ki, çox xoşdur.
- Öz oyununuzu necə qiymətləndirirsiniz?
- Qiyməti baş məşqçi verir. Bütün oyunlarda qapıda durmuşam. İnamlı oynamaq, səhv buraxmamaq üçün əlimdən gələni edirəm.
- Amma "Kasımpaşa"nın qolu məhz sizin yaratdığınız penalti nəticəsində vuruldu...
- Sizi əmin edirəm ki, orada penalti yox idi. Mən rəqib futbolçuya toxunmamışdım, o, özünü yerə atdı.
- Almaniyanın "Enerji" klubu ilə oyunda da komandanızın qolu məhz sizin buraxdığınız səhv nəticəsində buraxdığı bildirilir...
- Ola bilər ki, hansısa səhvlərim olur. Amma mən hər oyunda yüz faiz səhvsiz oynamağa çalışırma. Məşqçilər bütün səhvlərimi mənə deyirlər. Amma siz dediyiniz oyundan sonra hansısa səhvimin olduğu barədə heç kim bir söz deməyib.
- Oyunlarınızı millinin məşqçilər korpusu, AFFA-nın məşqçilər komitəsinin üzvləri də izləyir. Onların bəzisinin fikrincə, sizdə müdafiəçilərlə əlaqə çatışmazlığı var. Siz belə fikirlərlə razısınız?
- Mən gənc qapıçıyam, qarşımda oynayan müdafiəçilərin isə 34-35 yaşı var. Axı onların üstünə qışqıra bilmərəm. Mən onlarla danışıram, amma az. Ümumiyyətlə, xarakterimdə kiminləsə qışqıraraq danışmaq yoxdur. Özü də belə təcrübəli futbolçulara. Əksinə, lazım gəldikcə, onlar mənə məsləhətlərini verirlər.
- Yığmanın məşqçilərinin oyunlarınızı izləməsi sizin üzərinizdə təzyiq yaratmır?
- Xeyr, bütün diqqətim oyunda olur. Heç bir "manraj" yoxdur.
- Əksər mütəxəssislər sizin artıq Azərbaycan yığmasında əsas qapıçı olmağa əsas namizəd olduğunuzu düşünür. Çünki Kamran Ağayevin "Qəbələ"də problemləri var, Emil Balayev isə hələ "Ayntraxt"da özünü tapmayıb...
- Kamran ölkənin ən yaxşı qapıçısıdır. Mən ondan çox şey öyrənirəm. Başa düşürəm ki, Dmitri Bezotosnının "Qəbələ"yə gəlişindən sonra Kamranın klubunda bir nömrə ola bilməyəcəyi barədə söhbətlər formalaşacaq. Hər halda Robert Prosineçkinin yığmada kimə güvənəcəyini zaman göstərəcək.
- Kaxaber Sxadadze mövsümün sonunda "İnter"dən gedəcək. Sizcə, onu yerli məşqçi əvəzləməlidir, ya əcnəbi?
- Mən bunu deyə bilmərəm. Amma avrokuboklarda bizə çətin olacaq. İstənilən halda hər şeyin yaxşı olacağına ümid edirəm.
- "İnter"in əsas hədəfi avrokuboklara vəsiqə qazanmaqdır?
- Hədəfimiz bu mövsüm ya çempion olmaq, ya da ölkə kubokunu qazanmaqdır. Avrokuboklara isə mütləq düşməliyik. Baxmayaraq ki, "Qarabağ", "Neftçi", "Qəbələ" kimi güclü rəqiblərimiz var.
