Qurban Qurbanov: Bir oyunçu alacağıq

"Qarabağ"ın baş məşqçisi Qurban Qurbanov Xorvatiyanın "Split" klubuna uduzduqları (1:3) oyundan sonra fikirlərini açıqlayıb. Azerisport.az saytına açıqlamasında o, bunları söyləyib:

"Bu, bizim toplanış çərçivəsindəki ilk oyunumuz idi. Oyundan razı qaldım. Birinci hissədə gəncləri oynatdıq, ikinci yarıda əsas heyəti. Fasilədən sonra topa nəzarət bizdə idi. Maraqlı oyun alındı. Hər şey var idi, qollar da, qol vəziyyətləri də. Belə olacağını gözləmirdim. İki qolu öz səhvlərimizdən buraxdıq. Futbolçular bir qədər diqqətli olmalıdılar".

Qurbanovun sözlərinə görə, yetirmələrinin heç də hamısı qış fasiləsindən yaxşı forma ilə qayıtmayıb: "Uşaqlar istirahətdən yenicə qayıdıblar. 80 faizi yaxşı formamadır. Amma bəziləri fiziki hazırlıq zamanı zəif nəticə göstərdi. Zaman var və bu çatışmazlıqları aradan qaldırmalıyıq".

Baş məşqçi Muarem Muarem Türkiyənin "Əskişəhərspor" klubuna mümkün keçidi barədə də fikirlərini açıqlayıb: "Danışıqlar hələlik, dayandırılıb. Hər şeyə yaxın günlərdə aydınlıq gələcək. Transferin rəsmiləşməsinə mane olan bəzi məsələlər var. Məsələn, Türkiyə klubu Muaremə görə çox az pul təklif edir. Biz özümüz də onun Super Liqada oynamasını istəyirik. Amma onun komandamız üçün necə vacib futbolçu olduğunu da bilirik. Muarem yalnız iki klub arasında razılıq əldə olunacağı halda gedə bilər".

Ağdamlıların çalışdırıcısı mümkün transferlərlə də bağlı açıqlama verib: "Bir neçə futbolçu ilə maraqlanırıq. Yəqin ki, bu qış bir futbolçu alacağıq".