Namiq Yusifov: Muaremlə Leroy bizim üçün vacib oyunçulardır

"Qarabağ"ın yarımmüdafiəçisi Namiq Yusifovun azerisport.az saytına müsahibəsi

- Hazırlıq necə gedir?
- Hər şey yaxşıdır. Bizim üçün hər cür şərait yaradılıb.

- Komandanızın qış fasiləsinə qədərki çıxışını necə qiymətləndirə bilərsiniz?
- İki cəbhədə mübarizə aparmaq maraqlı idi. Amma buna baxmayaraq, pis təsir bağışlamadıq.

- UEFA-nın Avropa Liqasının qrup mərhələsi çərçivəsində qarşılaşdığınız Milan "İnter"i ilə ev oyununuzun nəticəsini dəyişəcəyinə ümidiniz var?
- Əlbəttə, ümid sonda ölür. Ona görə kiçik də olsa, ümidim var.

- Bu il daha güclü "Qarabağ" görə biləcəyik?
- Biz öz adımıza layiq oyun sərgiləməyə çalışacağıq.

- İnnosent Emeqaranın gedişini nəzərə alsaq, "Qarabağ"a yeni hücumçu lazımdır?
- Bu, məşqçilərin işidir. Amma komandada yüksək səviyyəli hücumçular nə qədər çox olsa, o qədər yaxşıdır. Emeqaraya uğurlar arzulayıram. O, istənilən komandada oynaya biləcək futbolçudur.

- Reynaldonun əvvəlki formasını bərpa edəcəyinə inanırsınız?
- Buna ümid edirəm. Reynaldo yaxşı oyunçudur. Bunu bir neçə dəfə sübut edib. Yenə də göstərəcək. Buna inanırıq.

- Amma Leroy Corcla Muarem Muaremin komandadan getməsi gündəmdədir...
- Məndə bu barədə xüsusi informasiya yoxdur. Sadəcə, onu deyə bilərəm ki, hər ikisi yüksək səviyyəli futbolçudur. Onlar komanda üçün vacibdilər.