Ruslan Qurbanov: Neftçini tərk edəcəyimi dəqiq deyə bilmərəm
"Neftçi"nin hücumçusu Ruslan Qurbanovun azerisport.az saytına müsahibəsi
- "Neftçi" Türkiyədəki ilk oyununda Səudiyyə Ərəbistanı "Hajer"inə 3:1 hesabıyla qalib gəlsə də, birinci hissəni pis keçirdi. Yalnız ikinci hissədə yaxşı oynamağınıza səbəb nə idi?
- Hazırda biz fiziki hazırlığa daha çox diqqət ayırırıq. Yalnız axşam məşqlərində toplu çalışmalarla məşğul oluruq. Maraqlı oyun olsa da, yorğun idik. Buna görə də oyunların gedişində nəyinsə alınmaması normaldır. Həm də nəzərə almaq lazımdır ki, ərəblərlə görüş 2015-ci ildəki ilk oyunumuz idi. Növbəti oyunlarda daha yaxşı çıxış edəcəyimizi düşünürəm.
- Bu oyunu millinin baş məşqçisi də izləyirdi. Sizcə, Robert Prosineçkinin fevralda açıqlayacağı siyahıda yer ala biləcəksiniz?
- Bu, tək mənə yox, digər futbolçulara da əlavə motivasiya verir. Onun klubumuzun oyunlarını izləməsi bizim üçün stimuldur. Ümid edirəm ki, özümü yaxşı tərəfdən göstərə və milliyə dəvət ala biləcəyəm. Robert Prosineçki kimi baş məşqçinin rəhbərliyi altında oynamaq üçün əlimdən gələni edəcəyəm.
- Rauf Əliyevin "Neftçi"yə keçidini necə qarşıladınız?
- Rauf yaxşı futbolçudur və o, bunu həm klublarda, həm də yığmada sübut edib. Onun gəlişi rəqabəti daha da gücləndirdi. Hər bir hücumçu özünü baş məşqçiyə göstərməyə çalıacaq. Kimin oynayacağına isə baş məşqçi qərar verəcək.
- Qarşıda "Neftçi"ni "Ərciyyəspor"la oyun gözləyir...
- Super Liqa təmsilçisi ilə qarşılaşma xeyrimizə olacaq. Mən ümumiyyətlə, güclü komandalarla oynamağın tərəfdarıyam. Belə komandalarla oynayanda həmişə nəsə öyrənmiş olursan.
- Sizi komandanın əsas heyət oyunçusu saymaq olar?
- Həmişə öz üzərimdə işləməyə çalışıram. Əlbəttə, qol vurmağım yaxşıdır. Amma komanda yoldaşlarım olmasa, mən də buna nail ola bilmərəm.
- Sizə də Rusiya və Türkiyədən təkliflər var?
- Rusiya Premyer Liqasından bir, birinci divizionundan iki, Türkiyədən dən 2-3 variant var idi. Amma mənim "Neftçi" ilə müqaviləm var və komandanı tərk edib-etməyəcəyimi dəqiq deyə bilmərəm. Əlbəttə, Avropada oynamaq istərdim. Bunun üçün isə daha çox çalışmaq lazımdır.
