Abdullayev: Simurqda daha tez-tez qol vurmağa çalışacağam

"Simurq"un yeni transferi, "Xəzər Lənkəran"ın sabiq yarımmüdafiəçisi Elnur Abdullayevin azerisport.az saytına müsahibəsi

- Dekabrda "Xəzər Lənkəran"la yollarınızı ayıran kimi "Simurq"a keçdiniz. Bu, necə baş verdi?
- Heç kim öncədən deyə bilməz ki, o, hansısa komandada həmişəlik qalacaq. Bu gün burdasan, sabah başqa komandada peyda ola bilərsən. Bu, normaldır. "Simurq"dan mənə təklif gəldi, baxdıq, danışdıq və razılığa gəldik. İndi yeni komandamla birgəyəm. Hər şey normaldır.

- Başqa klublardan da təklif almışdınız?
- Bəli. Yerli klublarla yanaşı, Türkiyədən də dəvət vardı. Amma mən "Simurq"u seçdim. İndi yeni komandama uyğunlaşmağa çalışıram. İnanıram ki, Zaqatala klubu ilə uğur qazana biləcəyəm.

- "Xəzər Lənkəran"da uzun müddət idi forma geyinirdiniz. "Simurq" karyeranız da belə uzun sürəcək?
- Dörd il idi Lənkərandaydım. Həm yaxşı, həm də pis günlərim oldu. Amma indi "Simurq"un futbolçusuyam. Yeni komandamın uğur qazanması üçün əlimdən gələni edəcəyəm. Ümid edirəm ki, "Simurq" karyeram da uzun sürər. Niyə də olmasın?

- Sizinlə yanaşı "Xəzər Lənkəran"ı xeyli oyunçu tərk etdi. Bu, sabiq klubunuzun işini nə drəəcədə çətinləşdirə bilər?
- Onlara uğurlar arzulayıram. Allah dözüm versin.

- "Simurq"un azarkeşləri barədə nə deyə bilərsiniz?
- Qoy onlar bizi dəstəkləməyə davam etsinlər. Allah eləsin ki, biz də onları öz qələbələrimizlə sevindirək.

- Artıq "Simurq"la ilk oyununuza çıxmısınız və komandanız qələbə qazanıb, siz isə qol vurmaqla yadda qalmısınız...
- Hər şey əla alındı. Qələbə qazanmaq həmişə xoşdur. Qol vurduğum üçün də şadam. Çalışacağam ki, "Simurq"da daha tez-tez qol vurum.