Rauf Əliyev: Komandamın maliyyə problemi ilə üzləşməsi mənim günahımdır?
Azərbaycan yığmasının və "Neftçi"nin hücumçusu Rauf Əliyevin azerisport.az saytına müsahibəsi
- Yeni klubunuzdakı uğurlu debüt münasibətilə sizi təbrik edirik. İlk oyununuzda "Neftçi" 3:1 qələbə qazandı, siz dubla imza atdınız..
- Sağ olun. Şadam ki, bu oyunda iki qol vura bildim.
- İkinci qol daha maraqlı alındı...
- Hə. Çalışdım ki, həm özümü, həm də "Neftçi"ni sevindirim.
- Yəqin ki, tribunada əyləşənlər arasında Azərbaycan yığmasının baş məşqçisi Robert Prosineçkinin də olduğunu gördünüz...
- Hə, fasilədə öyrəndim ki, o da oyunumuzu izləməyə gəlib.
- Altı aydan sonra bu klubu da tərk etməyiniz mümkündür?
- Bilirəm ki, mənim haqda çoxlu xoşagəlməz şeylər yazırlar. Amma mən bunlara fikir verməməyə çalışıram. Məgər oynadığım klubların maliyyə problemi ilə üzləşməsi mənim günahımdır? Elə vəziyyət yaranır ki, getmək məcburiyyətində qalıram.
- Yayda "Bakı"nı "Xəzər Lənkəran"a dəyişdiniz, indi də cənub klubunu "Neftçi"yə. Buna özünüz necə baxırsınız?
- Mən "Bakı"nı tərk etmək barədə düşünmürdüm. Amma klub mənə olan borcunu ödəyə bilmirdisə, nə edə bilərdim? Altı ay ərzində bir qəpik də almadığıma görə getməli oldum. Sonra "Xəzər Lənkəran"da da eyni problemlərlə üzləşdim və yenə klubumu dəyişmək zərurəti yarandı.
- Olmazdı ki, klubun maliyyə problemlərinə qatlaşıb qalasınız?
- Mən bununla heç nəyə nail ola bilməzdim. Oynadığım komanda sonuncu yerdə gedir, mən isə yığmada oynamaq, ora dəvət almaq istəyirəm. Həm də altı ay pulsuz oynamaq çox çətindir.
- Yayda bu "ənənə"nin davam etməsi barədə heç bir proqnoz vermədiniz...
- Ümid edirəm ki, müqaviləmin sonunadək "Neftçi"də qalacağam. Yeni klubumla ilyarımlıq müqavilə imzalamışam.
- Bəs "Neftçi"dəki hədəfiniz nədən ibarətdir?
- (düşünür) Düzünü deyim ki, nəyə nail olacağımızı indidən deməkdə çətinlik çəkirəm. Amma hər şeyin yaxşı olacağına ümidliyəm.
