Prosineçki: Emil Balayev millidə əsas qapıçı olmaq üçün Ayntraxtda özünü göstərməlidir
Bu gün Azərbaycan yığmasının baş məşqçisi Robert Prosinekinin Türkiyədə "Qarabağ"ın çalışdırıcısı Qurban Qurbanovla, eləcə də Ağdam klubunun və millimizin kapitanı Rəşad Sadıqovla görüşü baş tutub. Xorvatiyalı mütəxəssis görüşdən sonra azerisport.az saytına bəzi açıqlamalar verib:
"Mənim bu görüşlərdən müsbət təəssüratlarım var. Xüsusilə də Rəşad Sadıqovla görüşdən. Ondan və liderlik keyfiyyətlərindən öncə də xəbərim vardı. Qurban Qurbanovu isə Sent-Etyendə görmüşdüm. Amma həmin vaxt ətraflı söhbət üçün imkanımız olmamışdı".
Prosineçki yığmamızın Antalya toplanışı zamanı Litva ilə yoxlama oyunu keçirəcəyi barədə xəbərə də münasibət bildirib: "Litva ilə yoxlama oyunu? Bu, belə deyil. Biz hələ fevral toplanışı zamanı hansı komanda ilə qarşılaşacağımızı müəyyənləşdirməmişik. Özümüz bunu nə vaxt dəqiqləşdirsək, onda da sizə məlumat verəcəyik".
Xorvat mütəxəssis şəxsən izlədiyi "Neftçi"nin "Hajer"lə oyunu (3:1) barədə də danışıb: "Bu, "Neftçi"nin toplanış çərçivəsindəki ilk oyunu idi. Belə havada pis oyun sərgiləmədilər. Yanvarın 24-dək burada olacağam. Bizim komandaların daha çox oyununu izləməyə çalışacağam. Klubların baş məşqçiləri icazə versə, onların məşqlərinə də baş çəkmək fikrim var. Futbolçularla da şəxsi görüşlər keçirmək istəyirəm".
Millimizin baş məşqçisi Almaniyanın "Ayntraxt" klubuna transfer olunan qapıçı Emil Balayev barədə də fikirlərini dilə gətirib: "Balayevə Almaniyada çox çətin olacaq. Amma mən ona ümidliyəm. Yığmanın Səlahət Ağayev və Kamran Ağayev kimi qapıçıları da var. Emilin yığmada əsas qapıçı olması üçün Almaniyada özünü yaxşı tərəfdən göstərməsi lazımdır. Amma bu, çox çətin olacaq".
