Mehman Allahverdiyev: Kəpəz yenidən Premyer Liqaya qayıtmaq istəyir
"Kəpəz"in prezidenti Mehman Allahverdiyevin azerisport.az saytına müsahibəsi
- Klubunuzun işləri nə yerdədir?
- Hər şey normaldır. Komanda hələlik istirahətdədir. Yanvarın ortalarında toplaşacağıq. Dörd yoxlama oyununun keçirilməsi planlaşdırılıb.
- Geridə qalan futbol ili sizin yadınızda daha çox nə ilə yadda qaldı?
- Daha çox Gəncə futbolunun böyük futbolsuz qalması ilə. Hazırda biz sponsor axtarışındayıq. Stadionumuzu yeniləmək lazımdır. Bu il yenidənqurma işlərinə start vermək istəyirik. Yenidən Premyer Liqaya qayıtmaq istəyirik.
- Bəs bütövlükdə Azərbaycan futbolunda?
- Təbii ki, "Qarabağ"ın Avropa Liqasındakı uğurlu çıxışı. İlin sonunda hətta ölkə prezidenti İlham Əliyev də komanda üzvlərini qəbul etdi, onları mükafatlandırdı. Bu, bir daha göstərir ki, ölkə başçısı futbolumuzun inkişafını yaxından izləyir. Belə bir şərəfə daha çox komandamızın layiq görülməsini arzulayıram.
- Yəqin ki, ilin ən neqativ hadisəsi olaraq yığmamızın Xorvatiyaya 0:6 hesablı məğlubiyyətini qeyd edəcəksiniz...
- Həmin məğlubiyyət doğrudan da çox üzücü oldu. Amma daha çox "Araz Naxçıvan"ın çıxışını dayandırmasına üzüldüm.
- Buna görə çempionatımızda 9 klub qaldı. Ev oyunlarını Bakıda keçirən "Qarabağ"ı da çıxsaq, onların da sadəcə, dördü region təmsilçisidir...
- İndi çoxları regionda futbol olmadığını deyir. Amma çox şey klubların maliyyə durumundan asılıdır. Fikrimcə, yaxın gələcəkdə bölgə klublarının da vəziyyəti yaxşılaşacaq. Əlbəttə, rəqabətədavamlılıq da vacibdir. Məsələn, bu gün "Kəpəz", "Turan" kimi klublar Premyer Liqa klubları ilə rəqabət apara bilərlər. Amma istənilən halda maliyyə dayaqları lazımdır.
- Ötən il həm də Berti Foqtsun Robert Prosineçki ilə əvəzlənməsiylə nəticələndi...
- Foqtsun gedişi başadüşülən idi. Belə nəticələrdən sonra onun istefası gözlənilirdi. O, özü də bunu başa düşdü və istefa verdi, AFFA prezidenti Rövnəq Abdullayev də onu qəbul etməli oldu. Amma Prosineçki barədə hələlik, nəsə demək çətindir. Onun rəhbərliyi altında nə təlim-məşq toplanışı, nə yoxlama oyunu olub.
- İspaniyanın "Qranada" klubunun yarımmüdafiəçisi Eddi İsrafilovun Azərbaycan yığmasında oynamağa razılıq verməsini necə qarşıladınız?
- Əlbəttə, belə bir futbolçunun yığmamızda oynaması gözəl olar. Həm də azərbaycanlıdır, anası həmyerlimizdir. Bu üzdən də futbolçumuzun La Liqada oynaması ilə fəxr edə bilərik.
