Mahmud Qurbanov: Eddi İsrafilovun millidə əsas heyətdə oynayacağı şübhə doğurmur

Azərbaycan yığmasının məşqçisi Mahmud Qurbanovun azerisport.az saytına müsahibəsi

- Robert Prosineçkinin xəstə olduğu üçün Antalyaya gec gələcəyi heç kimə sirr deyil. Bəs siz ondan göstərişləri necə alırsınız?
- Yığmanın oyunçularına baxırıq. Əsasən yoxlama oyunlarını izləyirik. Hələ hansısa nəticə çıxarmaq üçün çox tezdir. Komandaların hamısı toplanışa yenicə başlayıb.

- Kimin hansı klubun düşərgəsinə gedəcəyini öz aranızda razılaşdırırsınız?
- Prosineçki hələ burda olmadığı üçün hər kəs hansı klubun düşərgəsinə gedəcəyinə özü qərar verir. Mənim Türkiyədəki ilk baş çəkdiyim oyun "Qəbələ"nin Hollandiya PSV-sinin ikinci komandası ilə qarşılaşma oldu. Yığmamızın üzvləri hələ ideal formalarından çox uzaqdır. Amma Roman Qriqorçukun bu problemi aradan qaldıracağını düşünürəm.

- Prosineçkinin bir neçə azərbaycanlı və xorvatiyalı köməkçisi var. Aranızdakı anlaşma necədir?
- Heç bir problem yoxdur. Hamı təcrübəli insanlardır. Bir-birimizi yaxşı başa düşürük. Hamımızın bir ümumi hədəfi var - yaxşı komanda formalaşdırmaq.

- Bundan öncə almaniyalı məşqçilərlə çalışırdınız, indi isə xorvatlarla. Hansı daha çox çalışır?
- Kiminsə çalışqan və ya tənbəl olduğunu müəyyənləşdirmək fikrim yoxdur. Hamı çalışır.

- Amma kənardan xorvatların daha çalışqan olduğu görünür...
- Bunu demək əvvəlkilərə qarşı hörmətsizlik olar.

- Yəqin ki, Azərbaycan yığmasının yeni futbolçusu - Eddi İsrafilovun çıxışını izləmisiniz. Sizcə, ölkəmizdə onun kimi yarımmüdafiəçi var?
- "Qranada"nın "Kordoba"ya qarşı oyununa televizordan baxmışam. İspaniya La Liqasında oynamaq hər futbolçuya qismət olmur. Yəqin ki, mənim bu cavabımdan nə demək istədiyimi başa düşdünüz.

- Bu, İsrafilovun yığmamızda əsas heyətə düşmək şansının çox olduğunu deməyə əsas verir?
- O, gəncdir və öz oyunu sayəsində La Liqaya düşüb. Biz yerli futbolçularımızı da belə güclü birinciliklərdə görmək istərdik. Əgər o, oynamağa davam etsə, millimizdə də əsas heyətə düşəcəyinə şübhə ola bilməz.