Aleksey Qay: Qəbələ yaxşı heyət formalaşdıra bilsə, istəyimizə çata bilərik
"Qəbələ"nin yeni transferi Aleksey Qayın azerisport.az saytına müsahibəsi
- Yeni komandanız necədir?
- Hadisələri qabaqlamaq istəmirəm. Hələ ki, hamı hər şeydən razıdır. Komandadakı atmosfer, futbolçuların bir-birinə münasibəti məni sevindirir.
- Yəqin ki, bu kluba Roman Qriqorçuka görə gəldiyinizi gizlətməyəcəksiniz...
- Baş məşqçinin məni komandasında görmək istəyi vardı. Müqavilə ilə bağlı da xüsusi fikir ayrılığımız olmadı. Hər şey çox sürətli alındı.
- Təcrübəli futbolçu olsanız da, ilk dəfə ölkə xaricində oynayacaqsınız. Çətin olmayacaq?
- Bu, mənim karyeramda ciddi addımdır. Yeni komandaya, mədəniyyətə mümkün qədər tez uyğunlaşmağım lazımdır.
- Artıq 32 yaşınız var. Səmimi olsaq, karyeranızı başa vurmaq, pul qazanmaq üçün gəldiyinizi demək olar?
- Mən futbol oynamaq və bundan həzz almaq istəyirəm. Hələ karyeramın nə qədər sürəcəyini bilmirəm. Mən futbolu daha gec buraxan futbolçulardan nümunə götürürəm. Belə nümunələr az deyil.
- Karyeranızı "Qəbələ"də bitirəcəksiniz, yoxsa, Qriqorçuk buradan ayrılan kimi, siz də gedəcəksiniz?
- İndiki məqamda nəsə proqnozlaşdırmaq çətindir. Bu günlə yaşayıram.
- Azərbaycana gələn əksər legionerlər sonradan ölkəmizdə belə güclü çempionat, klublar olduğunu gözləmədiyini etiraf edir. Bəs siz nə gözləyirsiniz?
- Həmişə güclü komandalarla oynamağı arzulamışam. Güclü çempionatda uğur qazananda, onun qiyməti daha yüksək olur.
- "Qəbələ"nin hazırda turnir cədvəlində neçənci yerdə getdiyini bilirsiniz?
- Hazırda yeni komanda formalaşdırılır. Ona görə də turnir cədvəlindən danışmaq yersizdir. Qarşımızda müəyyən hədəflər var ki, ona nail olmağa çalışacağıq. Hər şeyə rəğmən, iddialı olmağa davam etməliyik. Yaxşı kollektivimiz olsa, buna nail ola bilərik.
- Azərbaycana gəlişiniz Ukraynada necə qarşılandı?
- İnternetdə müxtəlif söhbətlərin şahidi olmaq mümkündür. Amma mən bunlara fikir verməməyə çalışıram. Hər kəsin öz fikri var. Mənim də futbola öz baxışım var. Həm də "Qəbələ"yə gəlmək barədə qərarı özüm qəbul etmişəm.
- Bəlkə tənqidlər haqlıdır? Çünki daha güclü çempionatdan zəif birinciliyə keçdiniz...
- Mən hələ Azərbaycan çempionatında oyuna çıxmamışam. Ona görə də çempionatın güclü və ya zəif olduğuna dair fikir söyləyə bilmərəm. Düzdü, Ukrayna çempionatının səviyyəsi yüksəkdir. Amma Azərbaycan çempionatının da güclü olacağına ümidliyəm.
