Vəli Qasımov: İsrafilovun yığmamıza faydası dəyəcək

İspaniyanın "Betis" klubunun və Azərbaycan yığmasının sabiq hücumçusu Vəli Qasımov "Qranada"da çıxış edən Eddi İsrafilovun millimizdə oynamağa razılıq verməsini şərh edib. Azerisport.az saytına açıqlamasında o, öncə bunları söyləyib:

"Onun La Liqada oynaması artıq çox şeydən xəbər verir. İspaniya çempionatı hazırda dünyanın ən güclü liqalarından biridir. Yeganə mənfi cəhət onun oyun təcrübəsinin az olmasıdır. Fikrimcə, belə bir futbolçu komandamıza mane olmaz.

Robert Prosineçkinin ona necə yanaşmasından, necə oynatmasından da çox şey asılıdır. Xorvatiyalı mütəxəssis onun oyun üslubundan yararlanmağa çalışmalıdır. Məncə, Eddinin bizə faydası dəyəcək. Yığmamızı gücləndirəcəyi şübhəsizdir. Bizim əksər futbolçularımızda Avropa səviyyəli futbol sərgiləmək çatışmazlığı var. Demək olar ki, bütün oyunçularımız Azərbaycanda və Türkiyədə oynayır. Səviyyə fərqini adi gözlə də görmək olur. Eddinin isə bu baxımdan problemi olmamalıdır.

İsrafilovun gələn kimi əsas heyət oyunçusu olacağını demək olmaz. Dediyim kimi, oyun təcrübəsi elə də çox deyil. Amma onun Avropa təcrübəsi yığmamızdakı işini asanlaşdıra bilər".