Emil Balayev: Komanda yoldaşlarımla dil tapmaq mənim üçün çətin olmadı

Azərbaycan yığmasının və Almaniyanın "Ayntraxt" klubunun qapıçısı Emil Balayevin azerisport.az saytına müsahibəsi

- "Ayntraxt"dakı işləriniz necə gedir?
- Şükür Allaha, hər şey yaxşıdır. Burada hər şey xoşuma gəlir.

- Artıq yeni komandanızla ilk mükafatınızı da qazanmısınız...
- Bir neçə gün öncə mini turnir keçirildi. Orada beş oyun keçirdik. Həmin oyunların üçündə meydanda oldum. Fikrimcə, debütüm pis alınmadı.

- Həmin turnirdə Dmitri Nazarovun komandası "Karlsrue" də iştirak edirdi və millidəki komanda yoldaşınız hətta sizə penaltidən qol da vurdu. Oyundan sonra buna görə üzr istədi?
- (gülür) Yox.

- Söhbət etməyə imkanınız oldu?
- Bəli, söhbətləşdik. Bir-birimizə uğurlar arzuladıq. Mən də ona komandasının tezliklə əsas Bundesliqada görünməsini arzuladım.

- Artıq sizi əsas Bundesliqa oyunlarının iştirak ərizəsində görmək olar?
- Bunu dəqiq deyə bilmərəm. Bu haqda qərarı məşqçilər verəcəklər.

- Bəs özünüz nə gözləyirsiniz?
- Məşqlər bu gündən bərpa olunub. Turnirdə iştirak edən futbolçulara istirahət verilmişdi. Mən hələ heç nə deyə bilmərəm. Burada mənə gənc və perspektivli qapıçı gözü ilə baxırlar.

- Yeri gəlmişkən, orada sizi necə qarşıladılar?
- Mənim üçün komanda yoldaşlarımla dil tapmaq çətin olmadı. Çünki ingilis dilini bilirəm.

- Azərbaycanın harada yerləşməsinə dair qəribə suallar vermədilər?
- Xeyr, elə suallar olmadı. Haradan olduğumu soruşdular, mən də Azərbaycandan olduğumu dedim, hamı da tanıdı.

- Alman dilini də öyrənməyi düşünürsünüz, yoxsa ingilis dili ilə kifayətlənəcəksiniz?
- Müqaviləmdə belə bir bənd var ki, alman dilini öyrənmək istəsəm, klubum mənim üçün müəllim tutacaq. Etiraf edim ki, alman dilini öyrənmək istəyim var. Tezliklə öyrənməyə başlayacağam.

- Frankfurtda harada yaşayırsınız?
- Klub məni mənzillə təmin edib. Məişət problemim yoxdur.