Samir Əliyev: Qarabağla rəqabət aparmaq çox çətindir

"Neftçi"nin əvəzedici komandasının baş məşqçisi Samir Əliyevin azerisport.az saytına müsahibəsi

- Artıq xeyli müddətdir "Neftçi"nin baş məşqçisiniz. Əsas komandaya məsləhət gördüyünüz hansısa futbolçu var?
- Bizdə istedadlı oyunçular var. Onlar yaxın iki-üç mövsüm ərzində əsas komandada oynaya biləcək səviyyəyə yüksələcəklər. Amma bunun üçün öz üzərlərində daha çox işləmələri lazımdır.

- "Neftçi"nin 2014-cü ildəki çıxışını necə qiymətləndirə bilərsiniz?
- Komanda Avropa Liqasının pley-off mərhələsinə qədər yüksəlməyi bacardı. Çempionatda da hələ heç nə itirilməyib. Qarşıda 16 tur var və bu müddət ərzində çox şey dəyişə bilər. Pis oynadığımızı düşünmürəm.

- Sizcə, daha uğurlu çıxış etmək üçün nə çatışmır?
- Hər bir komandada nəsə çatışmır. Mənə elə gəlir ki, bizdə yaxşı yarımmüdafiəçi ilə hücumçuya ehtiyac var. Bu mövqelərdə müəyyən çatışmazlıqlar var.

- Sizcə, qış çempionu olmuş "Qarabağ" titulunu qoruya biləcək?
- "Qarabağ"la rəqabət aparmaq hazırda çox çətindir. Hansı ki, 3-4 il öncə "Neftçi" ilə rəqabət aparmaq çətin idi. Fikrimcə, bu rəqabətin bəhrəsi də var. Hər iki komanda Avropa Liqasında kifayət qədər uğurlu çıxış etməyə nail olub.

- Elvin Yunuszadənin Türkiyənin "Akhisar Bələdiyyəspor" klubuna keçmək istəyi ilə bağlı nə deyə bilərsiniz?
- Xaricdə futbolçularımız nə qədər çox olsa, bir o qədər yaxşıdır. Ölkədən kənardan oynayan futbolçularımız özlərini yaxşı tərəfdən göstərdikləri halda digərləri üçün də yol açmış olacaqlar.