İlkin Sadıqov: Azərbaycan istənilən rəqiblə mübarizə apara bilər

19 yaşadək futbolçulardan ibarət Azərbaycan yığmasının hücumçusu İlkin Sadıqov Valentin Qranatkin turnirində Rusiya-2 komandasına qarşı keçirilmiş oyundan sonra (4:2) fikirlərini açıqlayıb. Azerisport.az saytına açıqlamasında o, bunları söyləyib:

- Komandamız çox yaxşı oynadı. Düzdür, Rusiya yığmasından da belə oyun gözləmirdim. Onlar müdafiədə çox kobud səhvlərə yol verdilər. Bizim 48-ci dəqiqədə vurduğumuz qol həlledici oldu. Ondan sonra hər şey bizim xeyrimizə işləməyə başladı. Mən özüm iki qol vursam da, daha artığına nail ola bilərdim. Üstəlik, bir epizodda da hakim təmiz penaltimizi vermədi.

- Komandamız artıq növbəti mərhələdədir. Finlandiya, Slovakiya kimi rəqiblərlə mübarizədə çempionluq uğrunda mübarizə apara biləcəksiz?
- Əlbəttə. Fikrimcə, komandamızın yaxşı potensialı var. İstənilən rəqibə qarşı oynaya bilərik.

- Yaponiya üzərində qələbə nə dərəcədə vacib idi?
- Çox vacib qələbə idi. Bu, bizə əlavə stimul oldu. Ruslarla oyuna daha inamlı çıxmağa nail olduq. Digər tərəfdən rəqibin bizə münasibəti də xoşumuza gəlmədi. Oyundan öncə bizə gülürdülər. Yəqin ki, asanlıqla qalib gələcəklərini düşünürmüşlər.

- Oyundan sonra baş məşqçi Nikolay Adam sizə nə dedi?
- Təbrik etdi və bildirdi ki, oyunumuzdan razıdır.

- Bu turniri əcnəbi menecerlər də izləyirdilər. Xarici klublardan mümkün təkliflərə necə baxırsınız?
- Çox sevinərəm. Amma hazırda "İnter"dəyəm və durumumdan da razıyam.