Elnur Cəfərov: Çempionluğa oynayırıq

Azərbaycanın 19 yaşadək futbolçulardan ibarət yığmasının hücumçusu Elnur Cəfərov azerisport.az saytına müsahibəsində Sankt-Peterburqda keçirilən Valentin Qranatkinin xatirə turnirində Yaponiyaya qarşı oyundan danışıb. O, ötən gün baş tutan və 1:0 hesablı qələbəyə sevindikləri oyundan sonra bunlar söyləyib:

"Hamı bizim yaponlarla oyunda böyük hesabla uduzacağımızı gözləyirdi. Hətta ən optimist insanlar belə minimal hesablı məğlubiyyətimizi proqnozlaşdırırdı. Amma biz inamlı oynadıq və qələbə qazana bildik. Yaponiya bu turnirin son qalibi olsa da, biz onlardan çəkinmədiyimizi göstərdik".

Gənc forvard bu gün Rusiya-2 komandasına qarşı keçiriləcək oyundan da danışıb: "Bu oyuna hazırıq. Heyətdə yer alan hər bir futbolçu bu oyuna çıxmağa hazırdır. Mən də oynamasam, layiqincə əvəz edə biləcək futbolçularımız var".

Qranatkinin xatirə turnirini müxtəlif klubların skautları da yaxından izləyirlər. Cəfərov əcnəbi klubların diqqət mərkəzinə düşməyin əleyhinə olmadığını deyir: "Mən də xarici klubların birində legioner həyatı yaşamaq istərdim. Fikrimcə, bunu hər bir futbolçu istəyir. Amma mənim hazırda "Xəzər Lənkəran"la müqaviləm var. Əgər hansısa klubdan "Xəzər Lənkəran"a rəsmi təklif gəlsə, yəqin ki, məni buraxarlar".

Elnur bu turnirin vacibliyindən də danışıb: "Məncə, bu turnirdə 3-cü və ya 4-cü yeri tutmaq barədə düşünmək lazım deyil. Komanda olaraq çempionluğa oynayırıq. Bu dəfə nəticəmizi yaxşılaşdırmalıyıq. Komandamıza buna nail olacaq gücdədir. Uşaqların da müəyyən təcrübəsi var və bunun bizə yardımçı olacağına inanıram".