Şahin Diniyev: İlin uğursuzu Rauf Əliyev, ən yaxşısı Qara Qarayevdir

Azərbaycan yığmasının sabiq baş məşqçisi, AFFA-nın məşqçilər şurasının üzvü Şahin Diniyev azerisport.az saytı üçün geridə qalan 2014-cü ilin yekunlarından danışıb.

İlin futbol hadisəsi
"Qarabağ"ın Avropa Liqasının qrup mərhələsinə çıxması. Onlar demək olar ki, pley-offa da vəsiqəni təmin etmişdilər. Amma hakim səhvi hər şeyin üstündən xətt çəkdi.

İlin məşqçisi
Mənə elə gəlir ki, ilin məşqçisini müəyyənləşdirmək heç kim üçün çətin olmamalıdır. Qurban Qurbanov.

İlin futbolçusu
Futbolçuların həm yığmadakı, həm də klublarındakı çıxışına baxmaq lazımdır. Mənə elə gəlir ki, ilin ən yaxşı futbolçusu Qara Qarayev oldu. Sabit çıxış etdi və faydalı futbolçu olduğunu göstərdi.

İlin qolu
İlin qolunun müəllifi Muarem Muarem sayılmalıdır. Çünki məhz onun Hollandiya "Tvente"sinin qapısına vurduğu qol "Qarabağ"ı Avroliqanın qrup mərhələsinə daşıdı.

İlin uğursuzu
İlk növbədə ağıla Rauf Əliyev gəlir. Ondan çox şey gözlənilirdi. Belə böyük potensiala malik futbolçu bu cür çıxış etməməli idi.

İlin transferi
Adətən ən uğurlu transferləri "Qarabağ" həyata keçirir. Amma bu il alış-verişsiz keçdi. Reynaldo ilə Riçard Almeyda öncədən alınmışdı. Düzdü, İnnosent Emeqara gəldi. Mənə elə gəlir ki, heç bir komanda uğurlu transfer həyata keçirə bilmədi.

İlin ən uğursuz transferi
"Qəbələ" və "Xəzər Lənkəran"ın transferləri

İlin komandası
"Qarabağ"

İlin hakimi
Bizim yaxşı hakimlərimiz var, amma konkret ad çəkə bilmərəm.

İlin gedişi
Emeqara qısa müddət ərzində oynadı, getdi. Mən isə ilin gedişi kimi "İnter"in baş məşqçisi Kaxaber Sxadadzenin adını çəkərdim. Çünki o, artıq 6-7 il idi burada çalışırdı.