Elvin Camalov: Klubum nə qərar versə, o da olacaq

"Qəbələ"nin yarımmüdafiəçisi Elvin Camalovun azerisport.az saytına müsahibəsi

- Roman Qriqorçukun baş məşqçi postuna gətirilməsini necə qarşıladınız? Onunla görüşünüz olub?
- Allah eləsin ki, onunla yeni ildə uğurlar qazana bilək. Bəli, Qriqorçukun komanda ilə tanışlığı olub. Bizim hər birimiz barəsində məlumatı var.

- Düşünmürsünüz ki, klub Dorinel Muntyanu ilə vidalaşmağa tələsdi?
- Futbolda belə hallar olur. Gənc futbolçuyam və məni daha çox öz çıxışım, məşqlər, uğurlarım maraqlandırır. Hansı komandada oynamağımdan asılı olmayaraq, onun ilk pillələrdə olmasını istəyirəm.

- Qriqorçukun sizi bəyəndiyi bildirilir. O, bu barədə sizə nəsə deyib?
- Qriqorçuk təcrübəli məşqçidir, yaxşı komandalarda çalışıb. Əgər məni bəyənibsə, deməli, daha məsuliyyətli olmağım lazımdır. Çalışacağam ki, baş məşqçinin etimadını doğruldum.

- Qurban Qurbanovun sizi "Qarabağ"da görmək istədiyi də bildirilir. Bu barədə nə deyə bilərsiniz?
- Bundan xəbərim yoxdur.

- Bəs özünüz Ağdam klubunda çıxış etmək istərdiniz?
- Mənim bu səviyyəyə çatmağımda, futbolçu kimi yetişməyimdə "Qəbələ"nin xidməti çoxdur. Bunu inkar etmək olmaz. "Qəbəıə" mənim üçün çox doğmadır. Bu üzdən də klubum nə qərar versə, o da olacaq.

- Gənc olsanız da, Yuri Syomin, Dorinel Muntyanu, Sənan Qurbanov kimi məşqçilərlə çalışmaq şansınız olub. Onların hansı ilə çalışmaq daha asan idi?
- Onların hər biri təcrübəli məşqçidir. Hər birinin öz stili, tələbləri vardı. Mən sadəcə, hər baş məşqçinin tələblərini yerinə yetirməyə çalışmışam.

- "Qəbələ"nin oyunlarını millinin baş məşqçisi Robert Prosineçki də izləyirdi. Sizcə, o, sizi diqqət mərkəzində saxlayır?
- Əgər milliyə dəvət etsələr, buna ancaq sevinə bilərəm. Təbii ki, yığmaya da çağırılsam, bu, mənim üçün çox böyük sevincə səbəb olacaq.