Elbəy Quliyev: Qarabağ və Neftçidə oynamaq maraqlı olardı
Rusiyanın "Ural" klubunun və Azərbaycanın gənclərdən ibarət yığmasının hücumçusu Elbəy Quliyevin azerisport.az saytına müsahibəsi
- Hazırda "Ural"ın ehtiyat komandasında oynayırsız. Baş məşqçi sizə kifayət qədər güvənir?
- Mən hələ 15-16 yaşım olan dövrdən etibarən ehtiyat oyunçulardan ibarət komandada çıxış edirəm. Əvvəllər daha tez-tez qol vururdum. Amma iki həftə əvvəl bizim baş məşqçimiz istefa verdi.
- Yeni baş məşqçiniz kim oldu?
- Onun köməkçisi olmuş Piçuqin.
- Əsas komandaya düşmək şansınız nə dərəcədə yüksəkdir?
- Hələ bilmirəm. Burada gənclərə o qədər də böyük ümid bəslənilmir. Məni hətta çempionatın iştirak ərizəsinə də salmayıblar. Ona görə də bu sualınıza cavab vermək mənim üçün çətindir.
- Əsas komandanın baş məşqçisi Aleksandr Tarxanovla tanışsınız?
- Bəli, onunla söhbətimiz də olub. Amma bu, mənimlə maraqlanmağa qədər irəliləməyib.
- Biz sizi Premyer Liqada görə bilməyəcəyik?
- Bilmirəm. Tarxanovun gəlişindən sonra əsas komandada çox az məşq şansı qazanıram. Vasilenkonun dövründə isə hər şey fərqli idi.
- Yəni öz gələcəyinizi "Ural"da görmürsünüz?
- Bu suala cavab vermək çətindir. Zaman göstərəcək. Hələ ki, mənə şans vermirlər.
- "Ural"ın hücumçusu Edqar Manuçaryanla münasibətləriniz necədir?
- Normal. Bir-birimizlə tanışıq. Salamlaşırıq. Hərdən futbolla bağlı nələrisə müzakirə edirik, vəssalam.
- Azərbaycan yığmasını seçməyinizə nə səbəb oldu?
- Bir il əvvəl şayiələr dolaşırdı ki, məni Rusiyanın gənclərdən ibarət yığmasına çağıracaqlar. Amma AFFA-dan özləri zəng etdilər. Bir il sonra isə artıq mən artıq gənclərdən ibarət yığmada idim. Buna görə də təəssüflənmirəm.
- Amma millinin son oyununda yox idiniz?
- Mənə heç kim zəng etməmişdi. Bernard Lippert yaxşı məşqçidir. Amma hələ də başa düşə bilmirəm ki, onun komandası hansı futbolu oynayırdı. O, sadəcə sürətə və texnikaya üstünlük verirdi.
- Artıq o, komandadan göndərilib. Təsadüfən Azərbaycan klublarından təklif almamısınız?
- Xeyr. Amma mənə "Qarabağ" və "Neftçi"də oynamaq maraqlı olardı.
