Matiya Şpiçiç: Qarabağla yanaşı, Neftçini də unutmamaq lazımdır
"İnter"in müdafiəçisi Matiya Şpiçiçin azerisport.az saytına müsahibəsi
- 2014-cü ili "İnter" üçün necə qiymətləndirə bilərsiniz?
- Mənə elə gəlir ki, il bizim üçün uğurlu oldu. Biz çempionatda yaxşı oynadıq. Avrokuboklarda azca bəxtimiz gətirmədi. Halbuki, daha artığına ümid edirdik. İli çempionatın ikincisi kimi başa vururuq. Hər şey normaldır.
- Amma eyni sözləri sizin haqda söyləmək olmaz...
- Bəli, bu il zədə problemlərim çox oldu. Çempionatın ortasında zədələndim, iki ay oynaya bilmədim. Ümid edirəm ki, gələn il mənim üçün daha faydalı olacaq.
- Siz zədələndikdən sonra müdafiənin solunda Arif Daşdəmirov, sağında isə Mirzəbəyov oynamaq şansı qazandı. Zədədən sonra heyətə dönmək çətin olmayacaq?
- Hər iki futbolçu yaxşı çıxış edir. Onlar öz şanslarından gözəl yararlandılar. Amma mən yenidən əsas heyətə dönəcəyimə ümidliyəm.
- Sizin bu qış "İnter"dən gedəcəyiniz doğrudur?
- Xeyr, bu, belə deyil. Mən komandada qalacağam. Belə söhbətlərin haradan meydana çıxdığını anlamıram.
- Başqa klublardan daha sərfəli təkliflər yoxdur?
- Bu barədə çox danışmaq istəmirəm. Çünki belə işlərlə menecerim məşğul olur. Mətbuatı da xüsusi olaraq izləmirəm.
- "İnter"in "Qarabağ"la mübarizədə çempion olması mümkündür?
- "Qarabağ" hazırda çox güclüdür. Hətta ötənilkindən də güclüdürlər. Əlbəttə, biz də çempion olmaq istəyirik. Bu, bizim hədəfimizdir. Amma "Qarabağ"la yanaşı, "Neftçi"ni də unutmamaq lazımdır.
