Ansi Aqolli: Bəxtim gətirib ki, Qarabağ kimi komandaya gəlmişəm
"Qarabağ"ın albaniyalı müdafiəçisi Ansi Aqollinin azerisport.az saytına müsahibəsi
- "Qarabağ" qış fasiləsinə çempion kimi yollandı. Geridə qalan ili necə qiymətləndirə bilərsiniz?
- Fikrimcə, 2014-cü il bizim üçün yaxşı alındı. Bizim uğurlarımız da bundan bəhs edir. Çempion olduq, Çempionlar Liqasında özümüzü yaxşı tərəfdən göstərdik, ardından Avropa Liqasının qrup mərhələsində çıxış etdik. Hazırda da çempionatda liderik.
- Bu il sizin üçün ən çətin oyun hansı oldu?
- Müasir futbolda asan oyun ümumiyyətlə yoxdur. Əvvəllər hansısa oyundan öncə bir komandanın qalib gələcəyini asanlıqla müəyyənləşdirmək mümkün idisə, indi elə deyil. Çünki hamı inkişaf edir. Ən ağır oyunlarımızdan biri Hollandiya "Tvente"sinə qarşı oldu. Həm çətin, həm də ağır oyun oldu. Bizə səfərdə sərfəli nəticə qazanmaq lazım idi və buna da nail olub, qrup mərhələsinə vəsiqəni təmin etdik.
- UEFA fevralın 5-də Milan "İnter"i ilə oyununuz barədə yekun qərarını açıqlayacaq. Sizcə, komandanız 1/16 finalda oynaya biləcək?
- Nə deyəcəyimi bilmirəm. Çünki hansı qərarın çıxarılacağından məlumatım yoxdur. Biz sadəcə, müsbət qərara ümid edə bilərik. Amma fikrimcə, UEFA-nın qələbəni bizə verəcəyini düşünmək mənasızdır.
- İnnosent Emeqara komandanı tərk etdi, Reynaldo isə hələ də zədəlidir. Düşünmürsünüz ki, bu, sizə problem yarada bilər?
- Emeqaranın gedişi ilə bağlı heç nə deyə bilmərəm. Çünki onun durumundan tam xəbərim yoxdur. Reynaldoya gəlincə, o, zədəsini sağaltmaqla məşğuldur. Ümid edirəm ki, mövsümün qalan hissəsində o, komandamıza kömək edə biləcək. Böyük ehtimalla Reynaldo Antalya toplanışı zamanı bizimlə birgə olacaq. Bu, yaxşı məqamdır.
- Düşünmürsünüz ki, sizə yeni hücumçu lazımdır?
- Bu barədə heç nə deyə bilmərəm. Belə qərarları komandanın baş məşqçisi Qurban Qurbanov verə bilər.
- Sizə başqa klublardan təklif gəlməyib?
- Mənim "Qarabağ"la müqaviləm var. İndi bütün diqqətim komandamın oyunlarına yönəlib. Digər klublar barədə düşünmürəm. "Qarabağ" mənim üçün doğma komandadır. Bəxtim gətirib ki, belə bir komandaya gəlmişəm. Həmişə "Qarabağ"a kömək etmək istəmişəm.
