Yaşar Seyidov: Rəhman ilə Nurlan müqaviləylə Bakıya məxsusdur
Son günlər Azərbaycanın iki gənc və perspektivli futbolçusu ilə bağlı çoxsaylı transfer xəbərləri yayılmaqdadır. Azerisport.az xəbər verir ki, bunlar müqavilə ilə "Bakı"ya məxsus olan Rəhman Hacıyev və Nurlan Novruzovdur.
Qeyd edək ki, Nurlan mövsümün əvvəlindən "zolaqlılar"ın uğurları üçün çalışır və mövsümün geridə qalan dövründə vurduğu 9 qolla Premyer Liqamızın qış fasiləsinə qədərki bombardiridir. Rəhman isə Türkiyənin "Qaziantep BB" klubunda çıxış etsə də, bir neçə gün öncə onlarla yollarını ayırdı. Amma o, hazırda "Bakı"ya məxsus olduğundan, ilk növbədə klubu ilə danışıqlar masası arxasına əyləşməlidi ki, gələcək taleyi ilə bağlı qarşılıqlı razılıq əldə etsin.
Amma həm Hacıyevin, həm də Novruzovun müxtəlif klublara keçidi gündəmdədir. Onların ilk növbədə "Neftçi"yə transfer olunacağı bildirilir. Bunu paytaxt klubundan da təsdiqləyiblər. Lakin onlar bu iki oyunçuya rəsmi təklif göndərmədiklərini bildirirlər.
Maraqlıdır ki, bir neçə gün öncə keçirilmiş AFFA klublar komitəsinin son iclasında "Bakı"nın futbolçularının digər klublarımıza transferinə qadağa qoyulub. Belədə, sözügedən transfer xəbərlərinin nə dərəcədə real olduğunu aydınlaşdırmaq üçün "zolaqlılar"ın direktoru Yaşar Seyidovla əlaqə saxladıq:
"Hacıyevlə Novruzov müqavilə ilə 2018-ci ilin 30 iyununa kimi "Bakı"ya məxsusdur. Onları heyətində görməyi arzu edən klubların bunun üçün iki yolu var. Bunlardan biri onları icarəyə götürməkdir. İkincisi isə onların transfer haqqını ödəməklə almaqdır. Yalnız ondan sonra bu iki futbolçu ilə müqavilə bağlaya bilərlər".
Seyidov Hacıyevin durumuna da aydınlıq gətirib: "Rəhman Türkiyə klubunda icarə əsasında çıxış edirdi. Artıq qarşı tərəflə yollarını ayırdığı üçün yenidən "Bakı"ya qayıtmalıdır. Hacıyevin 16 yaşında klubumuzda necə debüt etdiyini yaxşı xatırlayırsınız. Əfsuslar olsun ki, onun valideynləri Hacıyevin "Bakı"nın yetirməsi olduğunu unudurlar və elə bilirlər ki, futbolçu istədiyi kluba pulsuz keçə bilər. Biz başa düşürük ki, bu futbolçular "Bakı"nın təqdim etdiyindən daha çox qazanmaq istəyirlər. Amma FİFA-nın transfer məsələləri üzrə qaydaları var ki, onlara əməl etmək lazımdır".
