Dodo: Hakim Kamran Ağayevə qırmızı vərəqə göstərməliydi

"Qəbələ"nin yarımmüdafiəçisi Dodonun azerisport.az saytına müsahibəsi

- "İnter"lə oyundan hansı təəssüratlarınız qalıb?
- Yaxşı oyun keçirdik, bir daha göstərdik ki, yüksək yerlərə layiqik. Məni məyus edən yeganə məqam son saniyələrdə topu tora göndərə bilməməyim oldu. Həmin epizodda dəqiq olsaydım, indi qələbə qazanmış olardıq.

- Bu oyunda bir neçə maraqlı epizod oldu. Bunlardan biri "İnter"dən Elvin Məmmədovun meydandan qovulması idi. Sizcə, hakim ona haqlı olaraq qırmızı vərəqə göstərdi?
- Bəli. Çünki Ruslan Tağızadə artıq cərimə meydançasına daxil olurdu və rəqibin qaydanı pozmaqdan başqa çıxış yolu qalmamışdı. Hakim düzgün qərar qəbul etdi.

- Bəs Kamran Ağayevin Mikel Alvaroya zərbə endirdiyi epizodda onun meydandan qovulmaması nə dərəcədə ədalətli qərar idi?
- Düzünü deyim ki, mən hakimin Kamrana qırmızı vərəqə göstərəcəyini gözləyirdim. Amma Allaha şükür ki, o, bunu etmədi. Biz də tam heyətlə oynaya bildik.

- Yəni, qapıçınıza qırmızı vərəqə verilməliydi?
- Bəli. Hakim ona qırmızı vərəqə göstərməyə borclu idi.

- Roman Qriqorçukdan nə gözləyirsiniz?
- Hələ heç nə. Çünki onu tanımıram. Yanvarda toplanışımız olacaq. Orada tanış olacağıq.

- Fasiləyə 6-cı pillədə getməyiniz sizi üzmür?
- "Araz Naxçıvan"ın imtinasından sonra bizim altı xalımız silindi. Nəticədə, turnir cədvəlində də gerilədik. Düzünü deyim ki, mən karyeramda ilk dəfə belə olayla üzləşirdim. Bizdə yeni baş məşqçi təyinatı olub. Fikrimcə, bu, müsbət təsir edəcək və biz turnir cədvəlində irəliləyə biləcəyik.

- Dorinel Muntyanunun komandadan gedişini müsbət addım sayırsınız?
- Bu barədə danışmaq istəmirəm. Muntyanu da bacardığını etdi. Amma gördüyünüz kimi, bundan artığına nail ola bilmədi.