Danilo Dias: Qarabağ 2015-ci ildə məndən daha çox fayda görəcək

"Qarabağ"ın yarımmüdafiəçisi Danilo Diasın azerisport.az saytına müsahibəsi

- "Sumqayıt" üzərində qələbə ilə bağlı nə deyə bilərsiniz?
- İlin son matçı idi. Futbolçular artıq istirahəti düşünməyə başlamışdılar. Ona görə də bu oyunda bizə çətin oldu. Çempionatın autsayderlərindən birinə qarşı oynasaq da, asan qələbə qazandığımızı deməzdim. Pis oynamadıq. Layiqli qələbə qazandıq. Artıq evə yolllanıb istirahət edə bilərik.

- "Qarabağ" üçüncü dövrə üçün də yaxşı xal fərqi yarada bildi...
- Bu, bizi arxayınlaşdırmamalıdır. Əminəm ki, əsas izləyicilərimiz bizi qabaqlamaq ümidini itirməyiblər və bunun üçün çempionatın qalan dövrü ərzində əllərindən gələni edəcəklər. Bizə isə sadəcə, sabit oyun sərgiləmək qalır.

- İstənilən halda komandanız qış çempionudur...
- Buna görə nəsə bağışlasaydılar, bayram edərdik (gülür). Mövsümün əvvəli ilə müqayisədə həyatım çox dəyişib. Mən böyük bir ailənin, komandanın içinə düşmüşəm. "Qarabağ"ın bir parçası olmaq sevindiricidir. Özümü burada xoşbəxt hiss edirəm.

- Hətta mövsümün böyük bir hissəsini buraxmalı olsanız da?
- Bəli. Zədə səbəbindən Avropa Liqasında komandama kömək edə bilmədim. Amma Allaha şükürlər olsun ki, komandam mənsiz də layiqli çıxış etdi. Uşaqlar və Qurban Qurbanova məni dəstəklədiklərinə görə təşəkkürümü bildirirəm.

- Hazırda özünüzü necə hiss edirisiniz?
- "Xəzər Lənkəran"a qarşı oyunda son iki dəqiqədə meydanda oldum. "Sumqayıt"la qarşılaşmada isə 20 dəqiqə oynadım. Tədricən əvvəlki formamı bərpa etməyə çalışıram. Rəsmi oyunların startına qədər 100 faiz hazır olacağımı düşünürəm. 2015-ci ildə "Qarabağ" məndən daha çox fayda görəcək. Baş məşqçi mənə inanır və mən də bu inamı öz oyunumla doğrultmaq istəyirəm.

- Baş məşqçinizdən çox razı görünürsüz. Artıq iki dəfə onun adını çəkdiniz...
- Qısa zaman ərzində onu tanıya bildim. Qurban Qurbanova böyük hörmətim var. O, mənim həm bir insan, həm də məşqçi kimi xoşuma gəlir. Onunla işləmək çox xoşdur. Böyük peşəkardır.